Kalaalerpassuit, savalimmiormiut, islandimiut aammalumi danskit nunat avannaamioqatigiittut katerisimaarnermik nuannarisallit, ”angerlarsimaffeeruttutullusooq” misigipput imerniartarfik, Skarv, Københavnimi Pilestrædimiittoq, ukiut arlalialuit matuma siorna matuneqarmat.
Skarv taamanikkut allanngortiterujussuarneqarpoq, inuusuttunut naleqqunnerusunngortillugu imerniartarfiit arlallit ataatsimoortut sananeqarlutik. AG-mili nalunaarut naapertorlugu, isersimasartutoqqani Skarvip ammaateqqinnialerpai.
Imerniartarfik Skarv aqagu januaarip ulluisa arfernganni, tassa Kunngit Pingasut Ulluanni, unnukkut nalunaaqutaq qulingiluanut ammaqqissaaq, ilimanarluinnarporlu Danmarkimut juullisioriartorsimasut tamanna nuannaarutigilluinnassagaat.