SKA 11 kivivoq

Umiarsuaaraq imartatsinni uuttortaasartoq, SKA 11 Arsuup eqqaani sapaatip-akunnera ataasingajak ikkarleqqareerluni ullaap-tungaani kaanngartinneqarpoq, minutsilli tallimat qaangiutiinnartut kivilluni.

- Ajoraluartumik ilisimagisatsitut, SKA 11 300 meeterisut ititigisumut kivivoq, umiarsuaaqqap naalagaa, Alex Jensen oqaluttuarpoq.

Umiarsuaaqqamik annaasaqarneq Kangilinnguani Sakkutooqarfimmit uggorineqarpoq. Umiarsuaaraq ikkarlikkaluaruni ajoqusertussaanngikkaluarpoq, qajannaatsumik amiligaagami. Uuttoortaasullu angallatigimmanni ikkarlittaannarpoq. Siornatigut uteriarnermigut kaanngarsinnaasarsimavoq, sisamanngormalli pisumi ikkarluit marluk akornannut ikkutivittoorpoq. Ikkarleqqaneranilu silarlulermat angallat ikkarlummut inngigissortalimmut anaarluttarnermigut arlalinnik putuvoq, ullumi kaanngartinneqarami immassutigisaminik.

Ikkarlinnermi inunnik ajoqusertoqanngilaq.

Alex Jensen ilisimatitsivoq SKA 11 nutaanngitsuusoq, taartissaanillu Sakkutuut Imarsiortut Qullersaqarfiat maanna ujarlilereersoq.