Sjakali illerneqanngilaq

Ineeqqami immikkoortitaalluni ukiuni arfineq-pingasuni parnaarussaaqqasimaneq naakkittaatsuliornerunanilu parnaarussap pisinnaatitaaffiinik sumiginnaanerunngilaq. Taama Inuit pisinnaatitaaffii pillugit Europami eqqartuussivik Strassbourgimiittoq ullumi aalajangiivoq.

Peqqarniisaarniat nunarsuarmi ulorianarnersaagaanni eqqartuussiviup taama isummernissaa ilimagisariaqarpoq.

Carlos aamma Sjakalimik taaneqartartoq 1970-ikkunni 1980-ikkunnilu nunarsuarmi peqqarniisaarniat ulorianarnersaattut ilisimaneqalerpoq (Osama Bin Laden taamatut tusaamasaanngikkallarmat) – tusaamanerlugaassutigalugit toqutsisarnini qaartartumeerisarnini sunngitsunillu sallunaveeqqutitut tiguaasarnini.

Sudanimi illoqarfiit pingarnersaanni Khartoumimiitillugu politikkikkut isumaqatigiissuteqarnikkut 1994-imi poorsuarmut ikillugu franskit parnaarussiviannut Parisimiittumukaanneqarpoq. Tassani ukiuni arfineq-pingasuni ineeqqami immikkoortitaalluni, parnaarussat allat akornanneeqqusaanani, nakkutigineqartuarpoq; kiserliorluni, atuarusaanngikkuni, TV-kkut isiginnaanngikkuni ullormut nalunaaquttap-akunnerini marlussunnguaannarni aneersinaatitaalluni.

Sjakalip pineqaatissinneqarnini kamaatigalugu inuit pisinnaatitaaffii pillugit eqqartuussivimmut suliassanngortitsivoq. Eqqartuussiviullu ullumi aalajangernera tamanut saqqummiunneqarmat paasinarsivoq, Sjakali sunnguamilluunniit maalaaruteqarnissamut pissutissaqanngitsoq.

Sjakali inoqatiminut nunarsuarmi ulorianartortitsinerpaatut isigisaammat isumannaallisaaneq sukannersuusariaqarsimavoq, parnaarussaaffialu Europami parnaarussiviit qanoq ittuunissaannut piumasarisaasunut nallersuussinnaakutsoorpoq. Siniffissaqarpoq, nerriveqarpoq, aquiffissaqarpoq, inigisaa igalaaqarpoq, aamma timigissarnissamut aneernissamullu periarfissaqarpoq. - Annerusumik pisariaqanngilaq, Europami Inuit pisinnaatitaaffii pillugit eqqartuussivik tunngavilersuivoq.

Sjakalili aningaasanik taarsiiffigitippoq, piffissaagallartillugu naammagittaalliornissamut periarfissinneqarsimannginnini pillugu tuppalliallaatissaanik 78.000 koruuninik tunineqarami.

Danmarkip Radioatigut tusagassiisoq Thomas Ubbesen oqarpoq, Sjakali suli parnaarussaaqqasoq aamma suliassanngortitsinermili kingorna ukiuni marlunni ineeqqami kisimiitsitaasimariarluni ukiormannamiit parnaarussaaqatimi akornanniissinnaatitaalersimasoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat