Sjællandimi timmissat nappaataannik ulorianartumik nassaartoqarpoq

Danmarkimi timmissat nappaataannik naammattuisoqareersorlu atuisartoqarnermut ministeri Lars Barfoed nalunaaquttap akunneri arlallit matuma siorna tusagassiortunik katersortitsivoq.

Sjællandip kujataani illoqarfiup Næstvedip eqqaani Svineøstrandimi tigutsisilik toqungasoq misissorneqarami paasineqarpoq timmissat nappaataannik H5N1-imik toqquteqarsimasoq.

Danmarkip eqqaamiorisaani nunani timmissat toqungasut misissorneqarnerini paasineqartarpoq timmissat nappaataannik toqquteqarsimasut, taamaattumik timmissat nappaataata Danmarkimut apuunnissaa ilimagineqareersimavoq.

Timmissat arlallit toqungasut nassaarineqarsimapput, taakkunanngalu ataaseq kisimi timmissat nappaataannik toqquteqarsimasoq uppernarsarneqarpoq.

Misissuinerup inerneri oqartussallu nassaarfimmi kilometerinik pingasunik annertussusilimmi nakkutilliiffissaminnik piareersarniassammata tusagassiortunik katersortitsinissaq utaqqinneqarsimavoq.

Nakkutilliiffimmi tassani timmissat nujuartat nujuitsullu akuliunnaveersaartinneqassapput killilersuisoqassallunilu.