Aappilattumi qaqutigoortumik qilalugartoqarnera nuannatigineqartoq

Aappilattumi sapaatip akunnerata naanerani qaqutigoortumik pisartoqarnera nuannatigineqarpoq.
Allattoq Mathies Hvid Toft, Bikki P. Kleist, Nukaaka Tobiassen
apriilip 08-at 2019 13:29

Aappilattormiut sisamanngornermi qilalugartoqarmat nuannattunnguupput. Qaqutigoortumimmi kujataani Aappilattup eqqaani qilalugartoqartarsimammat pisaqartumut Seth Lars Benjaminsenimut ilaqutaasut tulluusimaaqaat

Aappilattumi innuttaasut persuarsiuleruttorput. Piniartormi, 24-nik ukiulik, Seth Lars Benjaminsen Aappilattup kangerluata qinnguata tungaani sisamanngornermi ualilersoq qilaluaqqaarsimasoq persuarsiutigaat. 

- Pilluarnaq! Ingerlalluta uinnut oqarpunga: "Kaar ernitta pilluarteqaatigut, qaqutigoortukuloorluuniit pigilersinnaavarput. Nuanneqaaq.", piniartumut anaanaasoq, Isakke Benjaminsen oqarpoq.

Qilalugartumullu Seth Lars Benjaminsenimut angaajusup, Pavia Jakobsenip, puisissimalluni pilattareerluni soraluani ilimaginngilluinnakkaminik qilalugarsimasoq takulersimavaa.

- Ilaana! Sermip killingani naammattoorsimallugu sermip killinganiittoq taava silammut piniallatsiarparput. - Anginngittuaraavoq, anginngittoq. Mikisoq, qilalugartup angaa, Pavia Jakobsen oqarpoq.

Aappilattup eqqaani qaqutigut qilalugartarmata nuannaarutigineqarsimaqaaq. 

 Nuanneqaaq, nuannerpoq toqukkatsigu, Pavia Jakobsen oqarpoq.

- Nuigatta tulaffissaq inunnik ulikkaartoq. Qummukarpugut nuanneq. Ningiua 80-nik ukiulik aqqusaarpaa tummeqqani ingilluni aneersuartoq. Tupaallakuloorluni nah qanoq iliussaanga, Isakke Benjaminsen oqarpoq.

Anaanaasulli ernimi qilalugarsimanera suli persuarsiutigigallassavaa. 

- Paggatitsinitsinni inoqarnermik nuannisakuloorluta angerlarsimavugut. Unnuaq sininngilanga iluamik qungujuppaluppiaannarluta, Pisaqartup Seth Lars Benjaminsenip arnaa Isakke Benjaminsen oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk