Sivisunerusumik piffissaqarumaneq naqissuserneqarpoq

Kommuninik aaqqissuusseqqinnissamut piffissaliunneqartup kommuneqarfinnit arlaqartunit naammagineqannginnera borgmesterit kommunaldirektørillu Nuummi ataatsimiinneranni ippassaq marsip aappaani naggaserneqartumi naqissuserneqarpoq. Taama inerniliinermut Kanukokap siulittaasua Lars Karl Jensen ima tunngavilersuuteqarpoq:

-Borgmesterit isummernerat imaappoq; aatsaat ersarissivoq suliassat ersarissarneqarnissaat nammagassallu agguataarneqarnerannut tunngasut taavalu sumiiffinni oqartussaaqataaneq ersarissarlugit kiisalu nutaamik aqqissuussinissap iluarsaaqqinissallu piffissalersornerat ersarissarneqartariaqartut. Taamaattumik ataatsimiititaliamik, nalilersuinermik suliaqartussamik pilersitsisoqarnissaa noqqaassutigineqarpoq, Kanukokamilu siulersuisuunernit tamanna akuersissutigineqarpoq.

Naalakkersuisut siulittaasuat Hans Enoksen oqarpoq kommuninik aaqissuusseqqinnissamut piffissaliussaq Naalakkersuisunit aalajangiusimaneqartoq, tamanna ataatsimiittunit isumaqatigineqanngitsoq Lars Karl Jensen oqarpoq.

- Ukiarmili ukiumik ataatsimik kinguartitsisoqarnissaanik noqqaassutigineqartoq qaqeqqinneqarpoq aalajangiunneqarlunilu. Taanna Naalakkersuisunut oqariartuuteqarnissatsinni aallaaviussaaq. Kisianni qulaajaasussat nalilersuereeriarpata nalunarumaassanngilaq piffissaliussanut qanoq naleqqutsigisumik ingerlasinnaanersugut.

Kujataani kommunit Nanortalik, Narsaq Qaqortorlu ataatsimiinnermut peqataanngitsoorput silarlunnera pissutigalugu, taakku ataasinngorpat Narsarsuarmi Kanukokamit ataatsimeeqatigineqassasut Lars Karl Jensen oqarpoq.