Sivikitsuinnarmik atorfillit taartaagallartullu kisimik tapinut akileeqataasalissapput.
Utaqqiisigalugu inigisallit, sumiluunniit atorfeqaraluarunik, TAMARMIK akileeqataasarnissaat Palle Christiansenip, sapaatip akunnerata naanerani aalajangiusimavaa. Meeqqat Atuarfianni Ilinniartitsisut Kattuffianni, IMAK-imi, siulittaasup, Sivso Dorphip, tamanna tupaallaatigaa, isumaqarluni, taartaagallartunut sivikitsuinnarmillu atorfilinnut isumaqatigiissut kisiat atsiornikuugini.
- Ilinniartitsisut kattuffianni siulittaasoq ilumoorpoq, Palle Christiansen oqarpoq. Tassalu imaalerpoq atorfinerlaat taartaagallartullu kisimik utaqqiisaasumik ineqarnermi tapinut akiliuteqartalissapput. Peqqinnissaqarfimmi sulisunut taamaallaat tamanna siusinnerusukkut atuukkaluarpoq.
Atuinermi tapit qanoq annertutigissanersut suli ilisimaneqanngilaq. Kisianni akiliutit tassa imermik innaallagissamillu atyinermut aserfallatsaaliinermullu atorneqartassapput, Palle Christiansen ilisimatitsivoq.
Aaqqiineq ukiap tungaanut atuutissaaq. Naalakkersuisut suliffeqarfiillu taamanikkut nalilissavaat taamatut aaqqiineq atorsinnaanersoq atuisulluunniit akiliuteqartalissanersut.