Siverthip marlunnik ilaasortaatitaqaqqilerrneq qiimmatsaatigaa
- Nuannaartorujussuuvunga, Siulittaasoq Siverth K. Heilmann taama oqarpoq.
Atassut naalakkersuisooqatigiinnit 2016-imi ukiakkut peersinneqarpoq taava aamma Inatsisartuni ilaasortaatitani marluk, Knud Kristiansen aamma Mala Høy Kuko, Siumumut nuummata annaavai.
Atassummilu siulittaasoq Siverth K. Heilmann partii Inatsisartunut sassartissinnaajumallugu atsiornernik taamani katersisariaqarsimavoq.
Naammassisaqarfiulluarporlu.
Partiip Inatsisartunut qinersinermi taasinerit 5,9 procentii pissarsiarai, naalli qinersinerup siulianut 0,6 procentinik kinguariaallassimagaluarlutik nuannaaqaat:
- Aallaqqaataaninngaanniit aallartilluta angusarput naammagisimaaqaara. Soorunami neriuutigigaluarparput amerlanerulaarnissarput, kisianni taamaakkaluartoq ilaasortaatitarisimasagut marluk isertikkatsigit uannaartorujussuuvugut, Siverth K. Heilmann taama oqarpoq.
Siulittaasoq Aqqaluk Jerimiassenilu taamaasillutik Inatsisartuni ilaasortanngorput.
Politikkimik ilisimasallit marluk Atassutip kalaallit politikkianni siunissaa qularnartoqartillugu KNR TV-kkut siorna novembarimi oqarput.
Partiimimi suleqatigiinniarnikkut taamani ajornartorsiormata, partiip siunissami ataannarnissaa ilimaginngikkaluarpaat.
Ilungersornikkulli akerlianik takutitsipput
Atassut inuusuttunik siuariartortunik arlalinnik maanna ilaasortaqarpoq, taakkualu siulittaasup isumalluarfigai.
- Inuusuttut isumalluarnartut tullinnguupput aquummik tigusiartornissaat, Siverth K. Heilmann Nunatta Nipaanut taama oqarpoq.
