Siverth K: Piffissakinneraasut ingasattajaarput
Oqallinnissamut piffissakinneraasut tassaapput Pinngortitamut Avatangiisinullu peqatigiiffik Avataq, tamannali naalakkersuisunut ilaasortap isumaqatiginngilaa.
- Taama oqalunneq ingasaassineruvoq. Aatsitsiviummi sumiiffissaatut piukkussat pillugit pitsaaasumik paasisitsiniaasoqareerpoq, tassa Maniitsumi, Sisimiuni Nuummilu. Isornartorsiuineq Nuummi tusarsaaneruvoq, kisianni misissuinerit pisariaqartinneqartut piffissaqarfigineqarput aamma nunani allani misilittakkat ilanngunneqassapput, Siverth K. Heilmann oqarpoq.
- Soorlu Brasiliami aatsitsivik tikeraagara aallartinniarneqalermat avatangiisinik illersuiniaqatigiinnit akerlerineqarsimagaluaqaaq, maannali tapersersorneqalerluni, naalakkersuisunut ilaasortaq ilanngullugu oqarpoq.
Alcoap pilersaarutaa aatsaat 2009-mi ukiakkut Inatsisartunit isummerfigineqassaaq. Taamaattorli Inatsisartut upernaaq manna ataatsimiinneranni aatsitsiviup sumiinnissaa aalajangiiffigineqassaaq.