Siverth K: Ilumoorpoq qimminik naalliutsitsisoqartarpoq

februaarip 05-at 2007 14:00

Qimmeqarfiusuni qimminik naalliutsitsisarneq pillugu qimmeqarnermut tunngasunik oqartussaasup oqaaseqarnera ilumoorpoq, Inuussutissarsiornermullu Naalakkersuisoq Siverth K. Heilmann oqarpoq. Qimmeqarfinni qimminik naalliutsitsisarneq pillugu uumasut nakorsaasa marluk oqaluttuaat, Danmarkimi aviisimi atuarneqarnerpaasimapput. Tamatumali unitsinneqarnissaa naalakkersuisup iliuuseqarfiginiarnerpaa?

- Taanna nutaarsiassaanngilaq aamma qatsunnarsilerpoq, takornariaqarnermut siuarsaarusulluni qimmit taamatut eqqartorneqarneri ussassaarinermut iluaqutaanngillat, Siverth K. Heilmann oqarpoq. Taanna kajumissaarivoq innuttaasut peqatigiillutik inatsisit malitsinniartariaqaraat.

Sivert K. Heilmann aperaarput Naalakkersuisuunerata nalaanni qimmit pitsaanerusumik atugaqalissanersut, akivorlu:

-Neriuutigaara, suleqatigiikkutta aatsaat inatsisit pioreersut malitsikkutsigit, minnerunngitsumik qimmillit inuussutissarsiutimittut atortakkatik pigilluarniarunikkik isumaqarpunga nakkutiginerusariaqaraat, naalliutsitsisarnerit akuerineqarsinnaanngillat. Piaartumik unitsinneqarluinnartariaqarput, oqarpoq.

Qaammarsaanissaq pisariaqalinngila? aperaarput.

-Qaammarsaaneq pisariaqartinneqarpat suleqataasariaqassaagut, isumaqanngilangali qimmillit tamarluinnarmik taamaattut, isumaqarpunga pitsaap tungaanut allartinniartariaqaripput tusaamanerlunneqarneq qaangissagutsigu.

- Aningaasanaasiit apeqqutaassapput, nalilersueqqaartariaqassaagulli. akivoq.