Siverth K. Heilmann tartuluttumut akissuteqarpoq
Ippassaq radioaviisimi 25-nik ukiulik tartuluttoq Emilie Egede Rigshospitalimi aamminik salitsittoq aamma qatanngummi angutip Hans Brandtip tartuanik ikkussivigineqarnissaminik itigartitaasimasoq oqaluttuaraarput.
Qatanngutaata angutip Danmarkimi najugaqarnera sulinerminilu akissarsiassaraluisa annaaneqartussat Namminersornerullutik Oqartussat akilerumanngilaat.
- Suliaq pillugu allakkatigut saaffigineqanngilagut, Hans Brandtili uatsinnut saaffiginnissinnaavoq. Aammali kommuniminut saaffiginnissinnaavoq pisullu pillugit sullissisutut saaffigisartakkani ilisimatissinnaallugu, Siverth K. Heilmann, Suliffeqarnermut Inuussutissarsiutinullu Ilinniartitaanermut Naalakkersuisoq oqarpoq.
- Hans Brandtip Maniitsumi ilinniartuunera pissutigalugu ilinniagaqarnersiutini immaqa pigiinnarsinnaassavai, aammattaarli suliffissarsiuussisarfik suliamut ilanngunneqartussaalluni, tassami napparsimanersiutini tassani qinnuteqaatigisussaammagit, Vivi Petersen Narsami isumaginninnermi pisortaagallartoq oqarpoq, taassumalu aamma malugeqquaa sullissisutut saaffigisartakkat kommunimiit kommunimut allanngorarsinnaasarnerat.