Siverth K. Heilmann: Piginnaaneqarnerput takutittariaqarparput

Sulisinnaanermut ilinniartitaanermullu piukkunnarsarnissaq pillugu ilinniartitaanerup iluani susassareqatigiit tamarmik Katuami ullumi aallartittussamik isummersoqatigiissapput. - Avataaninngaanniit sulisunik tikisitsiinnartarneq qaangerneqassappat uagut nammineq piginnaasaqarnerput takutittariaqarparput, Inuussutissarsiornermut naalakkersuisoq Siverth K. Heilmann oqarpoq.
Allattoq Mads Lynge
septembarip 03-at 2008 06:17

”Siunissaq pilersiguk”. Taama qulequtsiilluni isummersoqatigiittoqassaaq, Inuussutissarsiornermut, suliffeqarnermut, inuussutissarsiutinullu ilinniartitaanermut naalakkersuisoq Siverth K. Heilman oqarpoq:

- Suliffiit nutaat aggersut ukiuni makkunani eqqartortuarpavut, soorlu aatsitassarsiornermi suliffiit, aluminiuliorfissarsuaq, uuliasorsinnaaneq allarpassuillu, isumaqarpungalu isumalluarnartoq, Siverth K. Heilmann oqarpoq, nangipporlu:

- Ilinniartut amerliartuinnarput, tamannalu qujanaqaaq, aamma ilinniakkaminnik naammassinnittartut qujanartumik amerliartuinnarlutik, kisianni inissaqartinneqarnissaannut ajornartorsiuteqartoqartoq naalakkersuisuniit eqqumaffigaarput. Taamaammat aningaasarpassuarnik illikartitsinikuuvugut. Ukioq manna soorunami tamarmik naammassineqarsinnaanngillat, ukiullu tulliuttunut aningaasaliinissarput siunnerfigaarput, inatsisartunullu saqqummiukkumaarlugit, Siverth K. Heilmann oqarpoq.

Inuussutissarsiornermut, suliffeqarnermut, inuussutissarsiornermullu ilinniartitaanermut naalakkersuisoq Siverth K. Heilmann oqarpoq.

Isummersoqatigiinneq ”Siunissaq pilersiguk” aqagu naammassineqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq