Siverth K. Heilmann: - Peqataasariaqarpugut!

Sulisitsisut Peqatigiiffiata GA-p ujartorpaa Alcoa taama aningaasartaqartigisoq aningaasaliisartunit pikkorilluinnartunit Kalaallit Nunaata karsianiunngitsoq aningaasaliiffigineqartariaqaraluartoq. Taakku taama ujartuinerat Sisimiut borgmesteriata Hermann Berthelsenip tapersersorluinnarnerarpaa. Aatsitassanut Ikummatissanullu Naalakkersuisoq Siverth K. Heilmann aperaarput tamanna qanoq akissuteqarfigisinnaaneraa.
apriilip 07-at 2008 13:11

- Massakkut misissuileruttornerit ingerlanneqaleruttorput, uanga isumaga malillugu ungasinnerusoq eqqarsaatigalugu aatsitsivik aammalu erngup nukiliorfii ukiorpassuarni ingerlassappata taava pingaarsoraara inuiaqatigiit piginneqataanissaat kingulissagut aamma eqqarsaatigalugit, Siverth K. Heilmann oqarpoq.

Kalaallit Nunaata manna tikillugu alcoamut aningaasat atoriigai 30 mio. koruunit missaanniipput, taakkulu nunap assiliorneqarnissaanut siorna aningaasaliissutaapput.

- Imaallaallu Alcoap kisimi iluaqutissarinngisaanik nunap assiliorneq eqqornerujorujussuaq uagut aningaasaliinitsigut pilersinneqarpoq taannalu aamma kommunit atorsinnaavaat, iluaqutigineqalereernikuusorlu malugisinnaavara oqarpoq.

Naalakkersuisut Inatsisartunut aningaasanik 100 mio. koruuninik qinnuteqarput taakkulu upernaaq manna Inatsisartut ataatsimiinneranni akuersissutigineqassanersut nalilersorneqassapput, akuersisoqassappallu aatsaat Alcoa pillugu misissuinerit ingerlateqqinneqarsinnaalissallutik.

Siverth K. Heilmann aperaarput aningaasat taamak amerlatigisut pineqartillugit Kalaallit Nunaata karsianik nakkutiginninneq qanoq isumannaatiginersoq.

- Massakkorpiaq oqaatigereersinnaanngilara qanoq isumannaatsiginersoq isumannartiginersorluunniit. Kisianni Inatsisartunut saqqummiunneqarnera taamatut isikkoqarallarpoq kisiannili eqqaamaneqassaaq aatsaat aappaagu 2008-p 9-illu nikinneranni tamakkua qaqeqqinneqartussaassammata tassami misissuinerit ingerlaqqaarallassapput, Siverth K. Heilmann akivoq.

Taassuma qutsatiginerarpaa innuttaasut ernumasut isumalluartullu tutsiuttaannarmata, kisianni qujanartumik isumalluartut amerlanerunerat malugisarpara, Siverth K. Heilmann oqarpoq.

Alcoa peqatigalugu ilaatigut misissueqqissaartoqarnissaanut aningaasaliinissaq Inatsisartuni aappassaaneernissaa upernaaq manna pissaaq.

Alcoap pilersaarusiorneqarnera tamarmi katillugu koruunit 17 milliartiniit 23 milliardit missaata tungaannut naleqarpoq.

Siverth K. Heilmann erseqqissaavortaaq 30 mio. koruunit pineqartut nunap assiliornerinnarmut naatsorsuussaanngimmata aammali erngup nukiliorfiliornissaanut periarfissarsiorluni misissuinermut atorneqartussaanerarpai.