Siverth K. Heilmann: Assigiimmik akeqartitsineq iluatsilluarpoq

Assigiimmik akeqartitsinermik aaqqissuusseqqinnerit kinguneri maannamut killeqartupiluussuupput.

Aaqqissuusseqqissimaneq akileraarutinut aaqqissuusseqqinnermik ilallugu innuttaasut amerlanersaannut aningaasarissaarnerulernermik kinguneqarsivoq.

Inuussutissarsiutit eqqarsaatigalugit assigiimmik akeqartitsinermik aaqqissuusseqqissimaneq sunniu-teqanngingajavissimavoq.

Inuussutissarsiutinut, suliffissaqartitsinermut ilinniar-titaanermullu naalakkersuisoq, Siverth K. Heilmann, taama paasissutissiivoq, assigiimmik akeqartitsinermik aaqqissuusseqqinneq inatsisartuni ippassaq nalilersuiffigineqarmat.

Ukiup tullianut itinerusumik nalilersuiffigeqqinneqa-rumaarpoq, aaqqissuusseqqinnerup akuersissutigineqarnerani taama nalunaarutiginnittoqareersorlu.

Assigiimmik akeqartitsinermik aaqqissuusseqqinneq ukiuni tallimani atuuffeqarpoq ataavartumillu akitigut innaallagiaqarnermut aammalu imermut naleqqussaa-soqartarluni, akit piviusut eqqarsaatigalugit.

Nunaqarfimmiut illoqarfimmiullu sumi najugaqarneq apeqqutaatinnagu assigiinnik innaallagissamut imermullu siornatigut akiliisarput.

Siumup oqaaseqartartua, Lars- Emil Johansen, isumaqarpoq, sunniutigisinnaasanik misissueqqissaarneq amigaateqartoq inuussutissat pinngortitameersut pingaaruteqassusiat ilanngunneqarsimanngimmat, mianersuutigeqquaalu tuaviupiluttumik nalilersuisoqassanngimmat, soorlu assersuutigalugu, akileraarutinut aaqqissuusseqqinneq inaallagissamut imermullu atuinermik oqilisaataasimammat.

Atassummiit Augusta Sallingip maluginiaqquaa, atuinerup kingunerisinnaasaannik naatsorsuinermi akileraarutit taputartuunneqassanngimmata.Taamaalilluni paasineqarsinnaanngimmat innuttaasut taamatut allannguisoqarneratigut qanoq ittunik nammagassinneqarsimanersut. Augusta Salling naggasiivoq.

Assigiimmik akeqartitsineq ukiup tulliani nalilersuiffigeqqinneqartussaavoq.