Siverth K. Heilmann aamma sulinngiffeqarallalersoq

Siumumit politikerit marluk sulinngiffeqalereerput. 

Maannalu alla aamma sulinngiffeqalerpoq - Atassummeerlunilu: Siverth K. Herilmann aamma sulinngiffeqalerpoq. Taanna novembarip ulluisa 25-anni sulinngiffeqarnermini Maniitsumut angerlarallassaaq.

Siverth K. Heilmannip illoqarfiit pingaarnersaanni coronamik tunillatsissinnaanini ernumassutigaa.

- Siverthip qiteralimmigut siorna aseruuttoorujussuarnerata kingorna tunillatsissinnaanermut ilimanaatilittut inissisimalerpoq, Atassutip allattoqarfia KNR-imut oqarpoq.

Siverth K. Heilmannip Inatsisartuni sulinngiffeqarallarnerani Bentiaraq Ottosen sinniisussani siulliusoq taartaassaaq. Taassumali Aarhusimi VIA Universitet Collegemi allaffissornikkut bacheloritut ilinniarnini pissutigalugu nunatsinnukaqqaassaaq.

AAMMA ATUARUK Siumumit politikerit marluk sulinngiffeqarallartut

Nunatsinnullu angalasunut killilersuinerit pissutigalugit Bentiaraq Ottosen tikinnerminit ulluni tallimani angerlarsimaannarallaqqaassaaq.

Siumumit politikerit marluk aamma sulinngiffeqarallartut tassaapput Karl-Kristian Kruse aamma Jens Danielsen. Taakku sulinngiffeqarneranni "peqqissutsimut tunngasut pissutaasut", Siumup partiiata allattaa, Miki Jensen paasissutissiivoq.

Karl-Kristian Kruse sapaatini akunnerni sisamani sulinngiffeqassaaq Jens Danielsenilu sapaatini akunnerni marlunni sulinngiffeqassalluni. Siumup partiaani allatsip, Miki Jensenip politikerit marluk napparsimallutik sulinngiffeqarnerat itinerusumik oqaaseqarfigerusunngilaa.