Siutivut mianersuuttariaqarpavut
Ulluni makkunani aavartoqarpoq, amerlasoorpassuillumi eqqarsaatigineq ajorpaat, aavarlutik aallaasersornermikkut, inuunermik sinnerani tutsarluttunngorsinnaanertik.
Nunatsinni amerlasoorpassuit tusillakkumanngikkunik, elektronikki nutaaliaq atorlugu tusaassutitsinnik illersuusianik atugaqarnermikkut, imminnut iluaqusersinnaagaluarput, taama oqarpoq ulluni makkunani nunatta kitaani angalaartoq, tusilartut nakorsaanerat, aamma tusaassutitta nappaataannik immikkut ilinniagartooq, Henrik Bo Poulsen.
- Illersuutit nutaaliat elektroniskiusut ullumikkut pigineqalersimasut, piniarnerup nalaani tusaasanik allanngortitsineq ajorput.
Uumasut tusaalluarneqarsinnapput, kisianni aallammik seqqornermi nipi anillanniariartoq, illersuutit atukkat nipimik taama sakkortutigisumik nammineerlutik nipangersitsisarput, nipaarukkaangallu ingerlaannaq tusaasat ileqqumissut ilisarlutik, Henrik Bo Poulsen oqarpoq.
Piniartup taamaattunik illersuuteqarnissaa pingaaruteqarpoq, kisianni aamma piniaqataa ingerlaqataaluunniit aamma illersuuteqartariaqarpoq, Henrik Bo Poulsen oqarpoq. Immikkut aamma eqqarsaatiginerarpai meeqqat mikisut, nunatsinni piniariaqataalluni angalaqataasarsimagaangami takusarsimasani.
Meeqqammi aamma aallaasip seqqorneranit tutsarluttunngorsinnaapput, isumaqarpunga meeqqat tusaaniarnermikkut misikkarinnerugamik tutsarlulernissamut qaninnerusartut, Henrik Bo Poulsen oqarpoq.
Nunatta kitaani angalasareerluni, tusaaniarnikkut ajoqusersimasut qanoq amerlatigineri, Henrik Bo Poulsenip qanoq nalilersinnaaneraa aperineqarami, akivoq, aallaasinik seqqornerit kingunerinik tutsarlussisimasut amerlanerujussuusut, taamaattumik siunnersuutigaa Kalaallit Nunaanni Aalisartut Piniartullu Kattuffiat aqqutigalugu akeqanngitsumik, imaluunniit akikillisaanikkut, ilaasortat illersuutinik atuilernissaat periarfissiuuteqqullugu, tassamigooq akisuukasiummata.
Tusilartut nakorsaanerat tusaatittalu nappaataannik immikkut ilinniagartooq, Henrik Bo Poulsen, ulluni makkunani Narsamiittoq, taama oqarpoq. Henrik Bo Poulsenip aamma ilisimatitsissutigaa, tusaassutitsinnik illersuutit nutaaliat 8 - 900 koruunit missaannik akeqartut.
