Siusinaartumik sulisinnaajunnaarnermusiallip qaffaasoqaqqinnissaa neriuutigaa
Isumaginninnermut naalakkersuisup Maliina Abelsenip Siumumit siunnersuut itigarteriarlugu siusinaartumik pensionisiallit 13 procentimik qaffaavigiumavai. Tassa siusinaartumik pensionisiallit kisimiittut qaammammut 1.000 koruunit missaanik amerlanerusunik pisartagaqalissapput aappariillu 1400 koruunit missaannik pisartagaqarnerulissallutik, qaffaatissallu juulip aallaqqaataani 2010-mi atuutilersinneqassasut siunniunneqarput. Qaffaatissatut siunniussat utoqqalinersiallit pisartagaannut siorna qaffaavigineqartunut sanilliullugit nikigassuteqarput. Holger Kristiansenip nikigassutaasut isummerfigitinnagit takoqqaarusuppai.
- Tassa isumaqarpugut qaffaatissaq ajorissanatigut, taava takussavarput qanoq ingerlaqqissanersugut. Qaffaatissaq iluarinngikkutsigut akerliliinermi inatsisartunut saaffiginnissaagut. Tamatta iluamik inuusariaqaratta, meeqqatut aamma isigineqassanngilagut. Suna tamarmi akitsoraluttuinnarpoq, tamanna akuerisinnaanngilarput, pinngitsooratik anginerusumik qaffaasariaqarput, Holger Kristiansen oqarpoq.
Isumaginninnermut Naalakkersuisup Maliina Abelsenip siusinaartumik pensionisiallit pisartagaasa suli qaffaavigineqaqqinnissaanut siunnersuuteqaqqissaaq. Tassa akileraartarnermut atugarissaarnermullu ataatsimiititaliap siusinaartumik pensionisiat pillugit aaqqissuussineq aamma misissuiffigissammassuk. Suliarlu naammassineqariarpat siusinaartumik pensionisiat pillugit inatsisissamik siunnersuuteqarnissaq Isumaginninnermut Naalakkersuisup Maliina Abelsenip naatsorsuutigaa.
