Siusinaartumik soraarnerussutit qularnartumik tunngaveqarluni tunniunneqartarput

Karen Damsbo Jensenip kommunit isornartorsiorpai, sulisut isumaginninnermi siunnersortitut ilinniarsimanngitsut, qinnuteqaatinik suliaqartittarmatigit.

- Soraarnerussutisiaqalernissamut qinnuteqaatit nalilersorluarnissaat pingaartorujussuupput, isumaginninermi siunnersortit peqatigiiffianni siulittaasoq, Karen Damsbo Jensen, taama oqarpoq.

- Immaqa ilaatigut aamma peqqutaaqataavoq, kommunini assigiinngitsuni sulianik taamaakkuninnga suliaqartussanik isumaginninermi siunnersortinik ilinniarsimasunik atorfeqartoqannginera. Ilinniarsimanngitsut tamakkuninnga suliaqartartut ilisimasaqarfigisaratsigit. Tassalu siusinaartumik soraarnerussutisiaqalernissamut qinnuteqaatit ilinniarsimasunit suliarineqanngikkaangata, tamanna qinnuteqaatip naammaginanngitsumik suliarineqarneranik kinguneqarsinnaavoq, Karen Damsbo Jensen nassuiaavoq.

- Imaaratarsinnaavoq, siusinaartumik soraarnerussutisiaqalernissamut qinnuteqaatit nalilersoqqissaarneqaratik suliarineqarsinnaasartut. Tassalu illuanik aamma siusinaartumik soraarnerussutisiaqalernissamut qinnuteqaateqartut ilaat imaassinnaasoq pisinnaatitaanngikkaluarlutik siusinaartumik soraarnerussutisiaqalertut, Isumaginninnermi siunnersortit siulittaasuat naliliivoq.

Taanna taama isornartorsiuteqarluni saqqummerpoq, Nunatsinni siusinaartumik soraarnerussutisiallit ukiuni kingullerni 15-ini 52 procentimik amerlisimasut KNR-imit saqqummiunneqareersorlu.

Siusinaartumik pensionisiallit 1996-imi 2.020-iupput. Siornali 3.073-nngorsimalutik.

Karen Dambo Jensenip isornartorsiutaa, kommuneqarfiit kattuffiata KANUKOKA-p siulittasuata Martha Abelsenip paasilluarsinnaavaa.

Tassami kommunit isumaginninnermut allaffii piginnaasaqarluartunik sulisussaaleqipput.

- Isumagininnerup iluani sulisugut ilinniarsimasut ikippallaartut isertorsinnaanngilarput. Tassungalu tunngatillugu qiviartariaqarparput, isumaginninermi siunnersortinngorniat ilinniarfiata ukiumut naammassisinnaasai imaluuniit tassunga qinuteqartartut sooq taama ikitsiginersut. Namminersorlutik Oqartussat kommunillu akornitsinni kingumut qivialaarluta eqqartortariaqarparput, ilinniartitaaanerup taassuma qaffassarsinnaanissaanut sukkut pitsanngorsaasoqarsinnaanersoq periutsillu suut atorlugit aaqqissuussisoqarsinnaanersoq, Martha Abelsen oqarpoq.