Siusinaartumik soraarnerussutisiaqarneq ilungersunarpoq
Siusinaartumik sulisinnaajunnaarnersiuteqarluni inuuniarneq Danmarkimi oqinneruvoq.Taama oqarpoq Eva Wille, Danmarkimi najugaqarsimasoq.
Eva Wille, maanna Qeqertarsuarmi najugaqartoq, uinilu pisortaniit tigusartagaqanngitsoq, 2005-imi aamma 2008-mi Danmarkimi ukiipput. Taanna Danmarkimi pisortaniit aningaasanik tigusartagaqarneq pillugu ima oqarpoq.
- Danmarkimi sulisinnaajunnaarnersiutit 10.000 koruunit missaanniipput maanilu massakkut qaffammata 6.500 kruuniullutik. Inuuniarneq aamma soorlu nerisassat pisiassallu allat eqqarsaatigalugit akikinnerujussuungami. Taannartaa Kalaallit Nunaanninngaanniik pitsaanerussutigaa.
Kalaallit Nunaanni siusinaartumik sulisinnaajunnaarnersiuteqarluni inuuniarneq oqaamaatsuusoq, aammalu Danmarkimi pisortat aningaasatigut ikiorseeriaasiat maqaasisarlugu Eva Wille oqarpoq.
- Oqimaatsorujussuuvoq. Tassa uanga massakkut qaammammusigaangama akilillungalu, pisiniaraangama ooriutaarutereertarpunga qaamatip sinnerani aningaasivimmiussaqarnanga, taamaalillungalu ilaquttakka kisiisa isumalluutigilertarpakka, Eva Wille oqarpoq.
Siusinaartumik sulisinnaajunnaarnersiutillit Danmarkimi aammalu Kalaallit Nunaanni atugaasa imminnut nallersuunnissaat ajornakusoortoq, Kirsten Olesen, Isumaginninnermut Naalakkersuisoqarfimmi immikkoortortami pisortaq, oqarpoq.
- Siusinaartumik sulisinnaajunnaarnersiutillit aningaasat tigusartagaat imminnut assersuutissallugit ajornakusoorpoq, tassami atugarissaarnikkut aaqqissuussaaneq Danmarkimi Kalaallillu Nunaanni assigiinngissuteqarput. Imaassinnaavortaaq Danmarki Kalaallit Nunaannut naleqqiullugu atugarissaarnissamut atugassanik aningaasaateqarnerusoq - tamakkuli tamarmik qanoq aaqqissuussaassanersut politikkikkut aaliangingaasarput, Kirsten Olesen oqarpoq.
