Siusinaartumik soraarnerussutisiallit Naalakkersuisut millionerpassuarnik sipaarniarfiginiarpaat
Inatsisartut ukiakkut ataatsimiinneranni Naalakkersuisut inatsisissatut siunnersuutissaat taama oqaasertaqarpoq.
Ataasiakkaat sulisinnaassusiat nalilersuiffigeqqinneqassaaq, siusinaartumillu soraarnerussutisiallit tallimararterutaasa suliffeqarnermut utertissinnaanissaa Naalakkersuisut naatsorsuutigaat, nalinginnaasumik suliffeqalerlutik imaluunniit piffissap ilaannaani suliffeqalerlutik.
- Naalakkersuisut isumaqarput innuttaasut ataasiakkaat ilatsiinnaratik angerlarsimaffimminnilu issiaannaratik inuiaqatigiinnut tunniusseqataanissaat innuttaasunut ataasiakkaanut pitsaanerpaajussasoq.
- Siusinaartumik soraarnerussutisiaqartut amerlanerpaartaat sulisinnassuutsimik sinnera atorluartariaqarpaat, aaqqissuusseqqinnermilu suliffeqarnermi nalinginnaasumi piffissap ilaannaani suliffinnik neqerooruteqartoqarsinnaatinnagu, pisortani piffissap ilaannaani suliffissanik aammalu suliffissanik pisortanit tapiiffigineqartunik amerlanerusunik pilersitsisoqassaaq, Ilaqutariinnermut Inatsisinillu atortitsinermut Naalakkersuisoq Martha Lund Olsen siunnersuutimini taama allappoq.
Siunnersuut aappaagu 6,4 millionit koruuninik aningaasartuuteqarnerunermik kinguneqassaaq. Aningaasartuutillu 2016-imi 1,8 millionit koruuninut ikilisimassapput, 2017-imilu ikileriangaatsiassallutik. Naalakkersuisummi taamanikkussamut 10 millionit koruunit pallillugit sipaaruteqartoqarnissaa naatsorsuutigaat, 2018-imilu sipaarutissat 18 millionit koruuniussangatillugit.
