Siusinaartumik pensionisiat oqaluuserisassanngortinneqartut
Siunnersuut Inatsisartut Ilaqutariinnermut Peqqissutsimullu Ataatsimiititaliaanni oqaluuserineqarpoq, ataatsimiititaliallu isumaqatigiissup isumaliutissiissutimini allannguutissaq taperserpaa.
Inatsisissatut siunnersuut siusinaartumik pensionisiaqarnerup iluani aaqqissuusseqqinnerup annertuup siorna aasakkut ingerlanneqartup ilagivaa.
Naalakkersuisut naapertorlugit siunnersuutip siunertaraa siusinaartumik pensionisianik qaffasinnerpaamik pisartagaqartut tunngaviusumik pensionisisinnaanissaat, siusinaarluni pensionisiat qaffasinnerpaat 50 procentiisa nalinganik, aapparisap qanoq isertitaqarnera apeqqutaatinnagu.
Naalakkersuisut naapertorlugit, siunnersuut siusinaartumik pensionisiallit isertitaqarnissaannik siunertaqarpoq, taamaalillutik aapparisaminnik inooqatigisaminnilluunniit aningaasatigut tamakkiisumik isumalluuteqannginnissaat qulakkeerniarlugu, taamaalillutillu ulluinnarni pisariaqartitaminnut nalinginnaasunut, soorlu eqqiluisaarnermut atortunik nerisassanillu pisinissamut periarfissaqalersillugit.
Siusinaartumik pensionisiaqarnermik aaqqissuusseqqinnermi Naalakkersuisut naapertuutinngitsunik malitseqartitsinerat Inatsisartut Ilaqutariinnermut Peqqissutsimullu Ataatsimiititaliaannit iluarisimaarneqarpoq.
Malittarisassat nutaat januaarip aallaqqaataani atuuttussanngortinneqassapput Namminersorlutillu Oqartussanut ukiumut 7 millionit koruunit missaannik aningaasartuuteqarnerunermik kinguneqassallutik.
Inatsimmut allannguutissap novembarip 16-iani inaarutaasumik akuersissutigineqarnissaa naatsorsuutigineqarpoq.
