Siusinaartumik pensionisiallit killeqarfinni aporfigisartagaat peerniarneqartut
Isumaginninnermut naalakkersuisup Martha Abelsenip, Danmarkip sulisoqarnermut ministeria Troels Lund Poulsen, Savalimmiullu isumaginninnermut naalakkersuisuat Eyðgunn Jana Samuelsen ippassaq ataatsimeeqatigai.
Siusinaartumik pensionisiallit nunat pingasut taakku akornanni nuunnermikkut aporfigisinnaasaat ataatsimiinnermi eqqartorpaat.
AAMMA ATUARUK Kalaallit Nunaata Naalagaaffeqatigiiginnarnissaa Danmarkimi amerlanerussuteqartut tapersersorpaat
Siusinaartumik pensionisiaqaraanni pensionisiani pigiinnarlugu Nunat Avannarliit akornanni ullumi nuuttoqarsinnaavoq, Naalagaaffeqatigiilli iluanni tamanna periarfissaanngitsoq, Isumaginninnermut naalakkersuisup Martha Abelsenip oqaatigaa:
- Naalagaaffeqatigiinnerup iluani periarfissaq taanna ullumimut atuussimanngilaq, Isumaginninnermut naalakkersuisoq Martha Abelsen taama oqarpoq.
Aporfiit assigiinngitsut peerneqarnissaat pillugu suliniutit pingasut isumaqatigiissutigineqarput.
Suliniutit ilaat tassaavoq siusinaartumik pensionisiallit sulisinnaassuseqanngitsut, annikitsuaqqamilluunniit sulisinnaassusillit, Danmarkimi siusinaarluni pensionisiaqalernissamut akuerisaasimasut imaluunniit Savalimmiuni Kalaallit Nunaanniluunniit siusinaartumik pensionisianik qaffasinnerpaanik pisartagallit, naalagaaffimmi immikkoortortamut nuuffigisaminnut nammineq siusinaartumik pensionisianik pisartagaqarsinnaanissaat.
AAMMA ATUARUK Bertel Haarderip Naalagaaffeqatigiinnermi naligiinnerunissaq kissaatigaa
Nuunnermi sullissinerup pisariillisarneqarnissaa aamma sulissutigineqassaaq, piffissamik sullissiviusumik sivikillisitsisinnaasumik paasissutissanik paarlaasseqatigiittoqarnissaa siunniunneqarluni.
Siusinaartumillu pensionisiallit pilllugit suliniutit pingasut siusinaartumik pensionisialinnut iluaqutaassasoq naalakkersuisup oqaatigaa:
- Siusinaartumik pensionisiallit maannamut aallaqqaataaninngaanniit nunamut allamut nuunnerminni qinnuteqaqqaarlutik siusinaartumik pensionisiaqarnissamut suliap aallartittarnera atorunnaarluni ingerlaannartunngorsinnaanissaa soorunalimi iluaqutaassaaq, Isumaginninnermut naalakkersuisoq Martha Abelsen taama oqarpoq.
AAMMA ATUARUK Venstre: Naalagaaffeqatigiinni killeqarfitsigut aporfiusut ikilisinneqassapput
