Siusinaarlutik soraarnerussutisiaqalertartut amerlavallaarput
Periarfissat paasiniarlugit Ilaqutariinnermut Peqqissutsimullu naalakkersuisoqarfiup aaqqissugaanik, innarluutilinnik sullitaqartut 25-t ulluni pingasuni isumasioqatigiinnerat ullumi aallartippoq.
Isumasioqatigiinnermik aaqqissuussisoq, Naja Rosing Fleischer, oqarpoq. innarluutillit ilaat pisariaqanngitsumik siusinaarlutik soraarnerussutisiaqalertartu, uffa sulisinnaangaluarlutik.
- Periarfissaasuaneq imaluunniit periarfissanik takunnissinnaannginneq peqqutaasinnaavoq, Naja Rosing Fleischer oqarpoq.
Isumasioqatigiinnermi innarluutillit ilinniarsinnaanerat aamma suliffeqarsinnaanerat qulequtarineqarput.
Innarluutillit nunatsinni sulisinnaassusiat ilinniarsinnaassusiallu qanoq ippa?
- Soorunami innarluutillit ilarpassui suliffeqarsinnaanatilli ilinniarsinnaanngillat, kisianni qularinngilarput innarluutilittatta ilaat ilinniarsinnaallutillu suliffeqarsinnaasut.
Ilisimavisigit nunatsinni innarluutillit sulisinnaagaluartut ilinniarsinnagaluartullu arlaqarnersut?
- Qularinngilarput arlaqartut, kisianni qanoq amerlatigineri oqaatigisinnaanngilagut, nalugatsigit, kisianni periarfissiinissaq pingaarnerutipparput.
Innarluutillit pillugit isumasioqatigiinneq naammassippat siunnersuutigineqartut innersuussutigineqartullu naalakkersuisoqarfinnut attuumassuteqartunut ingerlateqqinneqassapput.
