Naalakkersuisut aningaasanut inatsisissatut siunnersuutaat illuatungiliuttunit sakkortuumik isornartorsiorneqarpoq. Demokraatit aningaasaqarnermut oqaaseqartartuat, Palle Christiansen oqarpoq siunnersuummi ersertoq naalakkersuisut suliassaq artoraat:
- Demokraatit aningaasanut inatsisissatut siunnersuut naammaginngitsorujussuuaat. Isumaqarpugut naalakkersuisut siunnersuummik naammassillugu suliarineqarsimanngitsumik saqqummiussisut, tassami erseqqissarneqanngitsunik saqqummiussimmata. Assersuutigalugu oqaatigineqarpoq akileraarutinit akitsuutinillu 100 million koruuninik isertitaqassasoq, suminngaanneersuunissaat nassuianngikkaluarlugu tamannalu Demokraatinit naammaginanngilluinnartutut isigaarput. Isumaqarpugut naalakkersuisut suliassartik artoramikku taamatut erseqqissarneqanngitsunik saqqummiussisut, Palle Christiansen oqarpoq.
Inuit Ataqatigiit siulittaasuat, Kuupik Kleist oqarpoq aningaasanut inatsisissap piareersarneqarnera imminut assortuuttunik ulikkaartoq.
- Sapaatip akunnerisa marlussuit matuma siornatigut Siumumit Lars- Emil Johansen oqarpoq aningaasanut inatsisissaq pillugu isumaqatigiinniarnerni IA ilaatinneqassanngitsoq. Naalakkersuisut ippassaq siunnersuummi saqqummiussaanni allaanngilaq akileraarutitigut akitsuutitigullu isertitassat amerleriaatissaat illuatungiliuttunut suliassiissutigineqartoq. Apeqqummi tamatumani qularnanngitsumik IA Demokraatinit Atassummiillu aqqutissiuussisinnaaneruvoq. Tassami isumaqarpugut akileraarutit akitsuutillu isumaginninnikkut akisussaassuseqarnerusumik ingerlanneqarsinnaasut, taamaalilluni nammaqataanissamut akissaqarnerusut akileeqataanerulersillugit. Isumaqatigiinniarnermi aallaavigisassarput tassaassaaq akissarsiat annertussusaat aallaavigalugu akileraarusersueriaaseq, Kuupik Kleist oqarpoq.
Demokraatit siusinnerusukkutuut sipaarniutissanik isertitassatullu siunnersuutinik nassarlutik isumaqatigiinniarniarput. Tamanna oqaaseqartartup Palle Christiansenip ima oqaatigaa:
- Siusinnerusukkut eqqaasariikkatsitut pisuussutit uumassusillit, maanna akeqanngitsumik agguaanneqartartut akitsuuserneqarnissaat piffissanngorsoraarput, tamannalu pillugu isumaqatigiinniarnermi siunnersuuteqassaagut, Palle Christiansen oqarpoq.
Kattusseqatigiit Partiiata siulittaasuata Anthon Frederiksenip Namminersornerullutik Oqartussat allaffeqarfianni sipaarniutissat aningaasaqarnermut inatsisissatut siunnersuummi amigaataasorai.
