Siunnersuut: Qulimiguulinniit umiatsianik perusunneruvugut

Illoqarfimmik pilersaarusiornermi arkitekti, Birger Lilja Kristoffersen, Sisimiuni Artekimi ataatsimeersuarnermi saqqummiussigami taama oqarpoq.

Birger Lilja Kristoffersenip Kommune Kujallermi angallanneq qanoq pisariinnerutigilersinnaaneranik siunnersuutit allat aamma saqqummiuppai.

Kommune Kujallermi qulimiguulinnik timmisartuussinerit akisuut ajornartullu atorunnaarlugit pisariinnerusumik angallattoqartarnissaa, Illoqarfimmik pilersaarusiornermi arkitektip  Birger Lilja Kristoffersenip angorusuppaa.

-Illoqarfimmiit illoqarfimmukarniarluni aamma nunaqarfimmiit nunaqarfimmukarniarluni angallanneq ajornarkusoorpoq. Akisuvoq, silarlunnermilu kinguaattoortoqarsinnaasarluni. Siunnersuutigaarput immakkut angallannissamut periarfissat ajornannginnerulernissaat. Taamatummi angalalluni qulimiguulinnit timmisartornermiit ajornannginneruvoq akikinnerullunilu, Birger Lilja Kristoffersen taama oqarpoq.

Taassuma ilanngullugu eqqaavaa Kommune Kujallermi nunaqarfinniit illoqarfinnut aqquserniornissaq ataatsimut isigalugu akisunavianngitsoq, qulimiguullimmi angallarnermut atorlugit akisoreermata ajornartorsiutaasarlutillu.

-Akissaqarniarnissaq tamatigut unamminarnerpaasarpoq. Aatsaallu Namminersorlutik Oqartussat suleqatiginerisigut piviusunngorsinnaasarlutik. Isumaqarpungalu angallanniarnerup aaqqissuussaanera allanngortinneqarsinnaagaluartoq ajornannginnerutilerlugu, taamaaliorneq akeqqatigiinnassammagu, Birger Lilja Kristoffersen taama oqarpoq.

Birger Lilja Kristoffersen aamma oqarpoq piffissanngortoq aqquserniornissaq eqqarsaatigissallugu. Sumiiffimmiit sumiiffimmut angallanniarnerup ajornannginnerulernissaa anguniarlugu. Taassuma maluginiagaasa ilagaat biilit aqqutaat nunami takussaalersimasut. Kuannersuarnilu aatsitassarsiulernissamut aamma aqquserniornissaq pisariaqalersinnaasoq eqqaavaa.

- Aqquserniortoqassagaluarpat, tamanna aatsitassarsiorfinnut iluaqutaassagaluarpoq, aammalu illoqarfinnut nunaqarfinnullu. Illoqarfinniit nunaqarfinniillu aqqusinikkut aatsitassarsiorfinnut suliartornissaat ajornanngitsuaraassagaluarpoq, Birger Lilja Kristoffersen taama oqarpoq.

Narsarsuarmi timmisartoqarfiup kujataani ataatsimoorfiunerusumut nuunneqarnissaa politikerinit inuiaqatigiinnillu eqqartorneqallattaavoq. Birger Lilja Kristoffersen aperaarput assigiinnannginneraa nutaamik mittarfiliortoqarpat.

-Illoqarfinnit pingasunit mittarfik qitiusoq allamut nuutsinneqarsinnaagaluarpoq, taamasiornikkummi assartuinerit annertuut akisuumik ingerlanneqassanngillat. Ullumikkummi qulimiguullit atorlugit assartuinerit akisoorujussuupput, Birger Lilja Kristoffersen taama oqarpoq.

Inatsisartut upernaakkut ataatsimiinnerani qaqortumi mittarfiliortoqarnissaq eqqartorneqassaaq.