Naalakkersuisut qinersisarnermut inatsit nutarterusuppaat.

Siunnersuut: Nunatsinneeqqilernerpit aqaguani qinersisinnaalissaatit

Nunatsinnut noorlaat Inatsisartunut qinersisinnaatitaalernissaminnut ukiuni marlunni utaqqisassasut, Siumup kissaatigaa.

Danmarkimi nunamiluunniit allami maanna ilinniartuuguit, nunatsinniileqqikkuit tikinninniit Inatsisartunut qinersisinnaatitaalissaatit.

Naalakkersuisummi tamanna siunnersuutigaat.

Kinaluunniit danskisut innuttaassusilik, nunatsinni sivikinnerpaamik ukiuni marlunni najugaqarsimasoq nunami allami ilinniareerluni sulereerluniluunniit kingusinnerpaamik qaammatit arfinillit kingorna nunatsinniileqqittoq, tikinnerminiit Inatsisartunut qinersisinnaatitaalissasoq, Naalakkersuisut siunnersuutigaat.

Inatsisartunut qinersisinnaatitaanermut maleruagassat maanna atuuttut

Kinaluunniit Inatsisartunut qinersisinnaatitaajumalluni maleruagassat uku tamaasa naapertussavai:

- danskisut innuttaassuseqassaaq
- 18-ileereersimassaaq
- Inatsisartunut qinersinissaq sioqqullugu nunatsinni sivikinnerpaamik qaammatini arfnilinni aalajangersimasumik najugaqarsimasuussaaq

Nunatsinnili aalajangersimasumik najugaqanngitsut inatsisartunut qinersinermi qinersisinnaatitaassaappput, nunatsinniit nuunnginnerminni nunatsinni inuit allattorsimaffianni sivikinnerpaamik ukiuni marlunni nalunaaqqasimagunik - aamma:

- ilinniarnerminnut atatillugu nunatta avataaniikkunik

- peqqissutsimik patsiseqartumik nunatta avataanikkunik

- Nunatsinni qinikkatut Danmarkimi Folketingimi suligunik

- nunatsinni Namminersorlutik Oqartussat sinniisuattut nunami allami najugaqarunik

Tusarfik: Sullissivik.gl

Tamanna massakkut qinersisinnaatitaalernissaanut piffissaliussamit sivikinneroqaaq, kinaluunniimmi Inatsisartunut qinersisinnaatitaaqqilersimasoq nunatsinni sivikinnerpaamik qaammatini arfinilinni aalajangersimasumik najugaqarsimanissaa piumasaqaataammat.

Ingammik ilinniartut oqartussaaqataaneruleqqullugit maleruagassat allanngortinnissaat pingaaruteqartoq, Siumut isumaqarpoq.

- Nunaqqatitta nunatta avataanut ilinniariareerlutik angerlaraangamik qinersisinnaatitaanngittarnerisa atorunnaarsinneqarnissaa Siumumiit pingaartutut isigaarput, Karl-Kristian Kruse siunnersuutip Inatsisartuni siullermeerneqarnerani oqarpoq.

Maleruagassat nutaat ilinniartunut nunatsinneersunut atuutiinnaratik, inunnut nunamut allamut Namminersorlutik Oqartussat sinnerlugit suliartorsimasunut, nunatta avataanut qaammatinit arfinilinnit sivisunerusumik katsorsartikkiartorsimasunut Folketingimilu ilaasortanut aamma atuutissapput.

Maleruagassat aapparisanut inooqatinullu Danmarkimeersunut aamma atuutissapput.

Siumut: Noorlaat qinersisinnaatitaalernissamut utaqqeqqaartariaqarput

Savalimmiuniilli Danmarkimiillu nunatsinnut noorlaat Inatsisartunut qinersisinnaatitaalernissamut ukiuni marlunni utaqqisariaqarnissaat, Siumup kissaatigaa.

Tamanna piviusunngussappat maleruagassat maanna atuuttut malunnartumik sukannernerulissapput. Danskisut maanna innuttaassusillit nunatsinnut nuunnerminniit nunatsinni qaammatini arfinilinni aalajangersimasumik najugaqareersimagaangamik Inatsisartunut qinersisinnaatitaalertarput.

- Danskit nunatsinnut nuussimasut qaammatialunnguani nunatsinneereerlutik qinersisinnaatitaalertarnerisa nalilersorneqartariaqarnera Siumumiit eqqaanngitsoorusunngilarput, Karl-Kristian Kruse siunnersuutip Inatsisartuni siullermeerneqarnerani oqarpoq.

Suleqatigiissitsisulli Danmarkimit Savalimmiunillu noorlaat ingerlaannartumik qinersisinnaatitaasarnissaat kissaatigaat.

- Naalagaaffeqatigiinni kikkulluunniit naligiissumik qinersisinnaatitaaffeqarnissaat qulakkeerumallugu, naalagaaffeqatigiinni nunamit arlaannaannilluunniit nunatsinnut nuuttut tikinnerminniit qinersisinnaatitaasariaqarput. Tamannami nunaqqatitsinnut naalagaaffeqatigiinni nunani allani najugalinnut aamma atuuppoq, Suleqatigiissitsisut siunnersuutip siullermeerneqarnerani oqaaseqaataanni allaqqavoq.

Tamatuma saniatigut Inatsisartunut - ulloq qinersiffissaq aamma sioqqullugu - digitaliusumik qinersisinnaalernissaq, Naalakkersuisut aamma siunnersuutigaat.

Siunnersuutaat illua tungiliuttut akuersaarpaat.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat