- Upernaviup Aqutsiveqarfiani taamatut titarniliisimaneq sunnguamilluunnit nunatsinnut aammalu aalisarnermut pingaarnerpaamillu pisassiissutit tamarmik qaqinneqartannginnerannik kiguneqartumik ingerlanneqarmat iluaqutaanngitsumik nalilerlugu peerneqartariaqartoq isumaqarpugut, SQAPK-p pisortaa, Erik Lange oqarpoq.Assi: KNR // Anton Gundersen Lihn

Siunnersuut: Naalakkersuisut pisassiissuteqarfiunngitsut atorunnaasiinniarniaraat

Nunatta avannaani sumiiffiit pisassiissuteqarfiunngitsut killelersukkamik aalisarfiussapput. SQAPK ilaatigut isumaqataavoq, Upernaviulli ilanngunneqannginnissaa kissaatigalugu.

Sisamassaanik iluatsitsisoqassaaq. Tamanna Naalakkersuisut upperaat.

Aalisarnermut Naalakkersuisup inatsisissatut siunnersuut ilaatigut sumiiffinnik pisassiissuteqarfiunngitsunik atorunnaasitsisussaq tusarniaassutigaa. Naalakkersuisut aatsaat unitsitsiniaalinngillat.

AAMMA ATUARUK Naalakkersuisut: Pisasiiffiunngitsuni aalisartarunnaarnissaq kingunerluuteqarnavianngilaq

Naalakkersuisut siunnersuut tusarsiaassutigisarlugulu Inatsisartuni 2017-imiilli ukiut tamarluinnaasa akuersissutigitinniarsarisarpaat. Pinerilli tamarluinnaasa itigartitsissutigineqartarpoq.

Naalakkersuisullu maanna sisamassaanik sumiiffinnik pisassiissuteqarfiunngitsunik atorunnarsitsiniarsaripput.

Isummat assigiinngitsut

Sumiiffiit pisassiissuteqarfiunngitsut peqatigiiffinnit amerlasuunit piffissap ingerlanerani isornartorsiorneqarsimapput, piniartuniilli aamma taperserneqartarlutik.

pisassiissuteqarfiunngitsuni qanoq aalisartoqartigisarnerata nakkutiginiarnera ajornakusoorsinnaammat tamanna attanneqarsinnaanngitsoq MSC-millu meqqeqarnermut uniffiliissasoq, Sustainable Fisheries Greenland isumaqarpoq.

- Attanneqarsinnaasumik atuinermut MSC-millu akuersissuteqarnissamut atatillugu aqutsiveqarfinni Qeqertarsuup Tunuani, Uummannami Upernavimmilu pisassiissuteqarfiunngitsut atorunnaarsinnissaat pingaaruteqarpoq, peqatigiiffik tusarniaanermi akissuteqarnermini allappoq.

Aalisartut ilaasa pisassiissuteqarfiunngitsut ilaannaat unitsinneqassasut isumaqarput.

- Upernaviup Aqutsiveqarfiani taamatut titarniliisimaneq sunnguamilluunnit nunatsinnut aammalu aalisarnermut pingaarnerpaamillu pisassiissutit tamarmik qaqinneqartannginnerannik kiguneqartumik ingerlanneqarmat iluaqutaanngitsumik nalilerlugu peerneqartariaqartoq isumaqarpugut, SQAPK-p pisortaa, Erik Lange oqarpoq.

Unitsitsisoqarnera aalisartoqaqqusaajunnaarneranik isumaqanngitsoq

Kalaallit Nunaanni aalisarnermut nakkutilliisut qalerallit 2018-imi 4325 tonsit aqutsisoqarfimmi Upernavimmi, Uummannami Qeqertarsuullu tunuani pisisassiissuteqarfiunngitsuni pisarineqarsimasut ukiut marluk matuma siorna paasissutissiissutigaat.

Aalisarneq taanna 78 millionit koruuninik naleqarpoq.

Pisassiissuteqarfiunngitsut aqutsisoqarfimmi Qeqertarsuup Tunuaniittut, Uummannamiittut Upernavimmiittullu pineqarput.

AAMMA ATUARUK Aalisartut politikkerisulli akerleriilerput

Tassa aqutsisoqarfinni aalisarnermi killilersuisoqarfimmi pisassiissutit nungunneqaraangata aalisartoq pisassiissuteqarfiunngitsunut aalisariartalertarpoq.

Siorna aalisarnermut naalakkersuisuusup, Nikkulaat Jeremiassenip pisassiissuteqarfiunngitsunik atorunnaarsitsineq imartani taakkunani aalisartoqaqqusaajunnaarneranik isumaqarnavianngitsoq KNR-imut paasissutissiissutigaa:

- Uani tusarniutigineqarnerani pineqarpoq pisassiivinngortinneqarsinnaanerat, imaanngitsoq tassani aalisarunnaarsitsisoqarniartoq, Nikkulaat Jeremiassen Qanoruumut oqarpoq. 

Naalakkersuisut oqarnerat naapertorlugu pisassiissuteqarfiunngitsut atorunnaarsinneqarnerat sumiiffinni aalisartoqaqqusaajunnaarnerannik isumaqarnavianngilaq. Sumiiffinnilu pisassiissutinik atuutsitsilernikkut nakkutiginnittoqarsinnaalernissaa pineqarluni.

Naalakkersuisoq suli neriuuteqartoq

Aalisarnermut, piniarnermut nunalerinermullu naalakkersuisup, Jens Immanuelsenip (Siumut) siunnersuutip akuerineqarnissaa neriuutigaa.

- Sinerissami aqutsivingortitsinissaq qaleralinniarluni aalisarfiusuni anguniarneqarpoq, tamannali naalakkersuisooqatigiinnermi isumaqatigiissummiimmat sulissutigineqarpoq, soorunami neriuutigaara tusarniaareernermi paasissutissat ilangullutik aaqqissuuneqareerunik siunertaasutut, naalakkersuisunut saqqummiunneqariarpat akuerineqarsinnaajumaartoq, Jens Immanuelsen KNR-imut allappoq.

Pisassiissutit uumassusilerituuut siunnersuuteqarneratigut aalajangerneqassasut, Naalakkersuisut siunnersuumminni allapput.

KNAPK-p Naalakkersuisut qaleralinniarnissamut pisassiissuteqartalerunik inuussutissarsiutigalugu aalisartut peqatigiiffiata siunnersuinera aamma tusarnaarneqartassasoq kissaatigaa.

AAMMA ATUARUK Pisassiiffiunngitsuni 78 millionit aalisarneqartut

- Tassa KNAPK sinerissap qanittuani inuussutissarsiutigalugu qaleralinniartut sinniissaattut pisassiinermi tusaaneqartarnissaat taamatut qulakkeerneqarnerusinnaammaat, KNAPK allappoq.

Naalakkersuisut 2014-imi juunip qaammataani akerlerineqangaatsiareerlutik aqutsisoqarfinni pingasuni Ilulissani, Uummannami Upernavimmilu qaleralinniarnissamut pisassiissuteqarfiunngitsunik atulersitsipput.

Taamani aalisarnermut naalakkersuisuusoq, Finn Karlsen, akerliusuuvoq, taamaakkaluartorli Inatsisartut amerlanerussuteqarlutik akuersillutik aalajangiipput.

Inatsisartunut ilaasortaq, Karl-Kristian Kruse (Siumut) taamani siunnersuuteqartuuvoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat