Siunnersuut ileqqutoqqanik uniuivoq
Nunatsinni sumiiffiit ilaat taaguuteqarput illoqarfiit tusaamasat, ilisimasassarsiortut aqqinik taakkulu aningaasaliisui aamma atsiunneqartarsimallutik. Siumumeersup Karl Lyberthip ujartorpaa kalaalerpalunnerusumik taaguusersuisalernissaq, siunnersuutaali qanga siulittaa atseeriaasiannut naapertuutinngitsoq Oqaaleriffimmi nunat aqqinik ilisimannittoq isumaqarpoq.
Karl Lyberthip ilaatigut siunnersuutigaa Danas Banke Qeqertarsuatsiaat Paamiullu avataanniittoq Tuusip imartaanik taaneqarsinnaasoq. Siunnersuutaa alla tassaavoq tunup avannaarsuaniittut Franske øer Lumumbap qeqertaanik taaneqarsinnaasut Sisimiormiut landsrådimut ilaasortarisimasaat Jørgen C.F. Olsen aamma Lumumbamik taaneqartartoq atsiullugu.
Taamatulli siunnersuuteqarneq kalaallit sumiiffinnik atseeriaasitoqaannut naapertuutinngitsoq Oqaasileriffimioq isumaqarpoq. Nunatsinnimi sumiffiit kalaallisut atserneqartarsimapput sumiiffiup qanoq ittuunera najoqqutaralugu. Assersuutigisinnaavarput Sarfannguit Sisimiut kujataanniittoq ikerasannguaq tininnermi ulinnermilu sarfaluartartoq pillugu taamatut atserneqarsimammata. Aamma Ilulissat assersuutigineqarsinnaapput illoqarfiup eqqaani iluliarpassuaqarnera atsiinermi tunngaviusimammat.
Taamatut atsiisarneq aamma issittumi naggueqatitta atugarisimavaat. Assersuutigalugu nunatsinni oqartarpugut Nuussuaq, Candami naggueqativut oqartartut Nuvujjuaq Alaskamilu naggueqativut oqartarlutik Nuvuk.
Aamma pisarsimasut najoqqutaralugit atsiisoqartarsimavoq. Assersuutigineqarsinnaavoq Pituffik. Tassagooq sissamiit arfassimariarlutik pisartik ujarassuarmut pituttarsimammassuk.
- Karl Lyberthip siunnersuutaa malinneqassappat siulitta atseeriaasiat alutornartoq soqutiginartorlu qimanneqassammat. Taamaasiorutta allamiut atseeriaasiat ilaarsiinnalissavarput, Lisathe Møller Kruse oqarpoq.
Taassuma erseqqissarpaa sumiiffiit aqqi Nunat Aqqinik Aalajangiisartut isumagisarmassuk. Tassani ilaasortat oqaasiliortunit Naalakkersuisunillu toqqagaapput. Taamaammat sumiiffinnik atsiisarneq politikkikkut aalajangiisarnerit avataanniippoq.
Taamaattoq Karl Lyberthip oqallissaarummik saqqummiussinera Lisathe Møller Krusep tikilluaqulluarpaa. Karl Lyberthip oqallissaarummini ujartorpaa maanna namminersulereeratta kalaalerpalunnerusumik atsiisalernissarput.
Aajuku kalaalerpalunnerusumik Karl Lyberthip atserneqarsinnaasorisai: Fynske Alper, Køge Bugt, Germania Land, Nyeboe Land, Washington Land, Inglefield Land, Nuna Kunngissaq Frederik, Kap Prins Knud, Watkins Bjerge, Prinsen af Wales Bjerge, Hertugen af Orléans Land, Kong Christian IX Land, Cap Ravn, Liverpool Land, Lille Pendulum, Walterschausen Gletscher, Academy Gletscher, Carlsberg Fjord, Kejser Frans Josef Fjord, Norske Øer, Franske Øer, Danas Banke, Fyllas Banke, Lille Hellefiske Banke, Bildsøe Nunatakker, Alabama Nunatakkeraamma Ymer Nunatak.
