Siunnersuut IA-mi aalajangiusimavaat
- Naalakkersuinikkut sulinermi sunaluunniit ajornarneq ajorpoq, apeqqutaaginnartarpoq politikkikkut poiumassuseqartoqarnersoq, Johan Lund Olsen oqarpoq.
Dansk Folkepartiip Nunarput pillugu oqaaseqartartua, Søren Espersen ippassaq Radioaviisimut oqarpoq, Namminersornermut Inatsit isumaqatigiinniutaaleraluarpat, tamanna Nunatsinnut aningaasatigut annaasaqaataaginnartussaassasoq:
- Inatsit allanngortinniarneqassappat suna tamarmi isumaqatigiinniutaalissaaq, aamma uuliasiornermi isertitaasinnaasut agguataarneqarnissaat, Søren Espersen oqarpoq.
Inuit Ataqatigiit Folketingimut qinigassanngortitaa, Johan Lund Olsen tamanna pillugu ima akivoq:
- Naatsorsuutigereerparput danskit taamatut oqalussasut, tassami ataatsimoortumik tapiissutit iluanaarutigisaleramikkit, ukiumut tapiissutigisartakkavut mangiarneqaleramik, tassalu Danmarki sipaaruteqarluni, soorunami Danmarkimi naalakkersuinermik suliaqartut, pingaartumik Dansk Folkeparti taamatut oqassasoq nalunngereerparput, Johan Lund Olsen oqarpoq.
Namminersornermut Inatsisip immikkuualuttortaanik allanngortiteriniarneq Nunatta avataanik isigineqarneranut innarliisussaasoq, Namminersornermik Inatsisip pinngoriartorneranut suleqataasoq, Jakob Janussen oqarpoq, taanna nanigilluni ippassaq Radioaviisimut ima oqarpoq:
- Isumaqarpunga imminornerusoq namminersornerup tunngavii ataasiakkaat apeqqusersulissagaanni, Jakob Janussen taama oqarpoq.
Johan Lund Olsen, taamaappa?
- Naamerluinnaq, inatsisilerituut ilisimasaqarluartut allatorluinnaq isummersorput, Johan Lund Olsen oqarpoq.
Taanna isumaqarpoq illuatungerisap, tassa Danmarkip, Nunarput kisimi iluanaarutigissappagu tamanna naligiinnertut oqaatigineqarsinnaanngitsoq:
- Namminersorneq pillugu Inatsit suliarigatsigu inatsit aallaqqaaserneqarpoq tamatta naligiimmik pissuseqatigiissasugut, ataqqeqatigiillutalu illuatungeriilluta, kisianni naligiinnginnerunngilaq illuatungerisap aningaasatigut iluanaarutigissappagu, Johan Lund Olsen oqarpoq.
