Siunnersuut Folketingimi oqaluuserineqartariaqanngissoraa
- Folketingimi inatsisiliuunnissaa tulluartinngilara, Naalakkersuisut namminneq suliassaattut isigigakku, Lars-Emil Johansen oqarpoq.
Pisortat aningaaseriviit aningaasaqarnerat pillugu paasissutissaanik ajornannginnerusumik pisinnaalernissaannik siunnersuut savalimmiut folketinngimi ilaasortaatitaannit Høgni Hoydalimit kiisalu Inuit Ataqatigiit Folketingimi ilaasortaatitaannit Juliane Henningsenimit siunnersuutaasoq, ippassaani siullermeerneqarluni oqaluuserineqarpoq.
-Siullermeerlugu oqaluuserineqarnerani folketingimi amerlanerusunik tapersersorneqanngilaq, tuinngavilersuutit ilaatigut uanga tuinngavilersuutinnut assingusut tunngavilersuutigineqarlutik, Lars-Emil Johansen oqapoq.
Tamannalu Savalimmiuni pissutsit tunngaviginerullugit siunnersuutaammat, Savalimmiut pillugit ataatsimiitsitaliami tamanna suliarineqassasoq Lars-Emil Johansen oqarpoq.
Lars-Emil Johansen Folketingimi 2004-mi siunnersuummut ippassaani siullermeerluni oqaluuserineqartumut assingusumik siunnersuuteqarsimavoq.
Siunnersuummulliuna maanna saqqummiunneqartumut sooq isumaqataanngitsoq?
- 2004-miit allanngortoqarsimaqaaq, pingaartumik Nunatsinni, namminersulersimavugumm, itaamaattumillu naalakkersuisut Nunatsinni oqartussaaffii annertusisimapput. Isumaqarpungalu tulluarnerussasoq Naalakkersusut nammineerlutik Danmarkimi naalakkersuisut tamanna isumaqatigiinniutigissagaat, Lars-Emil Johansen oqarpoq.
Siunnersuutip folketingimi siullermeerluni oqaluuserineqarnerani isumaqataanngikkaluarluni isuma pitsaasutut isigaa.
- Siunertaavoq Nunatsinni naalakkersuisut Danmarkimi naalakkersuisutuulli aningaaserivinnut paasissutissanik aallersinnaalernissaat, taanna isuma pitsaasuuvoq. Isumaqartungaliuna suliassaq Nunatsinni naalakkersuisut nammineerlutik Danmarkimi naalakkersuisunut isumaqatigiinniutigisariaqaraat, Lars Emil Johansen naggasiivoq.
