Siunnersuisut: Angallanneq qaammat qaangiuppat qanoq isikkoqarnissaa nalileruminaappoq

Angallannermi killilersuineq maajip 31-ata tungaanut atuutsinneqassasoq, Pisortaqarfinni coronalerisoqatigiit oqaatigaat.
Dash 8 Nuummut tikittoq
Ullumikkut nunatsinnukarniaraanni immikkut akuersissummik qinnuteqarnissaq, tikinnermilu ullut tallimat qaangiukkaangata misissorteqqinnissaq piumasaqaataasarpoq. Assi © : Kim Andersen
maajip 06-at 2020 17:19

Nunatsinniit nunatta avataanut angallanneq ammarneqaqqikkaluartoq, avataaniit qaqugu nunatsinnukarsinnaalissanersut suli oqaatigiuminaappoq. Nunatta avataaniit nunatsinnut angallanneq maajip naanissaata tungaanut killilersorneqarpoq. Tamannali sivitsorneqassanersoq taamaatinneqasanersoq allatulluunniit allanngussanersoq, suli nalunarpoq.

- Massakkut, maajip 31-ta tungaanut aalajangeqqavugut Kalaallit Nunaanut angalaneq, tikinnissaq killilersorneqassasoq. Strategisk Corona Stab tassa Pisortaqarfinni coronalerisoqatigiit siulittaasuat, Hans-Peder Barlach Christensen tusagassiortunut paasissutissiinermi taama oqarpoq.

Nunatsinnut nunatsinniilluunnit angallanneq killersorneqassanersoq, pisortaqarfinni coronalerisoqatigiit Naalakkersuisut siunnersortarpaat.

Nunatsinnut angalasinnaalernissamut tunngasunit politikerinut qanoq siunnersuuteqarumaarnissartik oqaatigisallugu siusippallaartoq, Hans-Peder Barlach Christensenip tusagassiortunik paasissutissiinermi oqarpoq. Politikerit maajip naannginnerani nalunaaruteqarnissaat naatsorsuutigaat.

- Nunatsinni tunillaassuunnerup killilersimaarniarlugu immaqalu allaat tunillaassuutoqalinnginniassammat, nunatsinnukarnissamik killilersuisariaqarpugut taaamakkallartittariaqarlugulu, siulittaasoq oqarpoq.

Corona qaangiutinngilaq

Nunatsinni nakorsaaneq, Henrik L. Hansenip oqarnera naapertorlugu coronamik ajornartooqqaneq qaammat ataaseq qaangiuppat qanoq inissikkumaarnersoq oqaatigiuminaappoq. Qanoq sukkatigisumik pisoqarumaarnersoq qaammatinilu kingullerni marluni qanoq pisoqareersimatiginersoq apeqqutaavoq.

Nakorsaanerup oqarnera naapertorlugu inuit 130-it Nunatsinnut sapaatip akunnerata siuliinnaani tikipput. Inuillu nunatsinnut tikittut amerliartortillugit nunatsinni coronaviruseqalersinnaanera ilimanarnerujartussaaq. Tamannalu avaqqunneqarsinnaanavianngitsoq, tusagassiortunik paasissutissiimi oqaatigineqarpoq.

- Nakkutiginneqqissaarniarpugut, ullulli ilaanni tuniluutilerumaarpoq. Corona qaangiutinngilaq, suli qaangiutinngilaq, nakorsaaneq oqarpoq.

Ullumikkut nunatsinnukarniaraanni immikkut akuersissummik qinnuteqarnissaq, tikinnermilu ullut tallimat qaangiukkaangata misissorteqqinnissaq piumasaqaataasarpoq.