Siunnersuisoqatigiit: Vestnorden Travel Martimut suli peqataajumavugut
Nunatta nunat avannarliit killiit takornariaqarnermi suleqatigiiffissuannut, Vestnorden Travel Martimut peqataajunnaarneranik oqaluttoqarnera ilumuunngitsoq, Nunatsinni Takornariaqarnermi Inuussutissarsiornermilu Siunnersuisoqatigiit oqarput.
Akerlianik nunatta, Savalimmiut Islandillu akornanni takornariaqartitsiniarnermi aaqqissuussaanerusumik suleqatigiittoqalernissaa Siunnersuisoqatigiinnit ujartorneqarpoq.
Nunatta Nunat Avannarliit Killiit Siunnersuisoqatigiivini ilaasortaatitat ilaata, Kuupik Kleistip oqaasii taamaasillutik qalleqqissarneqarput, Nunat Avannarliit Killiit akornanni takornariaqartitsiniarnermi annertunerusumik suleqatigiittoqalernissaq taassuma ujartormagu.
Maajip qaammataani ingerlanneqartartusssamik Greenland Travel Martimik pilersitsisoqarnissaa siunnerfigineqarpoq, Nunatsinnilu Takornariaqarnermi Inuussutissarsiornermilu Siunnersuisoqatigiinni Ineriartortitsinermut pisortaq, Hans Peter Poulsen ima tunngavilersorpoq:
- Savalimmiormiunik Islandimiunillu naalakkersuisutigoortumik itinerusumik suleqatigineqarnissaq soqutiginartipparput. Assigiinngitsutigut isumaqatigiissusiortoqarsinnaavoq. Takornariaqarnermut aningaasat atorneqartartut annertussusiat pissarsissutigisartakkatsinnut naleqqiullugit annikippallaarput. Taamaammat ilaatigut nammineerluta Greenland Travel Martimik ingerlatsiniarnerput nunatsinni takornariaqartitsinermik suliallit peqatigalugit suliarissavarput, Nunatsinni Takornariaqarnermi Inuussutissarsiornemilu Siunnersuisoqatigiinni Ineriartortitsinermut pisortaq Hans Peter Poulsen taama oqarpoq.
Nunat Avannarliit Killiit Siunnersuisoqatigiiffiat 18-inik ilaasortaqarpoq, Island, Savalimmiut nunarpullu tamarmik immikkut arfinilinnik ilaasortaqarmata.
