Siunnersuisoqatigiit: Takornariartaassuit ikinnerit tikittussaanerat nassuiaatissaqarpoq
Takornariartaatit 27-t missaanniittut 26.000-inik ilaasoqarlutik nunatsinnut aasaru tikinnissartik nalunaarutigereerpaat, siornali tikittut amerlanerupput, tassa takornariartaatit 33-t 30.000-inik ilaasoqarlutik tikimmata.
Takornariat ukiormanna tikittussat ikilinerannut peqqutit ilagaat, takornariartaassuaq Costa Deliziosa, 2.800 missaannik ilaasoqarsinnaasoq, tikinngitsoortussanngormat. Tassa Costa Concordiap Italiap sineriaani januaarimi kivinerata kingunerisaanik tikinngitsoortussanngorami.
Akitsuutilli qaffasissut, tassa umiarsuaatileqatigiit nunatsinnut tikinnerminni ilaasumut ataatsimut paxtaximik 525 koruuninik akiliutigisartagaasa, qaffasippallaarsinnaanerat takornariartaatit tikittussat ikilinerannut aamma patsisaaqataasinnaasoq, Takornariaqarnermut siunnersuisoqatigiit, Visit Greenland, KNR-imut allapput.
- Assersuutigalu ukioq kingulleq sikorsuaqarujussuarnera pissutigalugu takornariartaatit tikitassatik tikinngitsoorpaat, aamma paxtaxip annertunera pissutaasinnaalluni, taannami illoqarfinnut talinngikkaluaraanniluunniit pinngitsoorani akilerneqartussammat, Visit Greenlandimi siunnersorti, Rosannguaq Rossen, allappoq.
