Siunnersuisoqatigiit: Inissialeeqqinnermi ilaqutariit meerartallit immikkoortariaqarput
Ilaqutariit meerartallit inissialeqqinneqarnerminni ilaqutariinnik allanik najugaqateqassanngitsut Inuit Pisinnaatitaaffii pillugit Siunnersuisoqatigiit inassutaanni nutaani allaqqavoq.
Ineqarnissamut pisinnaatitaaffik qinikkanit eqqumaffigilluinnarneqartariaqartoq, Sara Olsvig isumaqarpoq.
- Inuit pisinnaatitaaffii tunngavigissagutsigit ineqarnissamut pisinnaatitaaffik eqqarsaatigalugu aap ajornartorsiuteqarujussuarpugut nunatsinni, taamaammallu iliuuseqartoqartariaqarpoq, Inuit Pisinnaatitaaffii pillugit Siunnersuisoqatigiit siulittaasuat, Sara Olsvig oqarpoq.
Ineqarnermut susassaqarfimmut paasissutissat
Nunatsinni innuttaasut 45 procentiisa missaat inissiani attartukkani najugaqartut, 24 procentii ilaquttaminni paaqqinniffinniluunniit najugaqartut 34 procentillu nammineq najukkamik pigisaqartut nalunaarusiami allaqqavoq.
Tamatuma saniatigut 2017-imi nunatsinni innuttaasut 878-it angerlarsimaffeqanngitsutut taakkunanngalu 469-it Kommuneqarfik Sermersuumiittut nalunaarsorsimasut nalunaarusiami allaqqavoq.
Innuttaasunik 2018-imi misissuinermi apersorneqartut 9 procentii qaammatini kingullerni aqqaneq-marlunni allamik unnuiffissaqanngitsumik unnuisoqarsimallutik oqaatigaat.
Oqartussanut inassutit
Taakkua ineqarnissamut pisinnaatitaaffik pillugu nalunaarusiaminni kommunenut Naalakkersuisunullu arlalinnik inassuteqarput.
-Tassanilu tunngavigisarput unaavoq: Inuit pisinnaatitaaffii eqqarsaatigissagaanni ineqarnissamut pisinnaatitaaffik inuup toqqissisimasumik ataqqinartinneqarlunilu pineqarluni inuunissaminut pisinnaatitaaffeqarnera, Sara Olsvig oqarpoq.
Ilaqutariit meerartallit inissialeqqinneqaraangamik, tassa inigisaminnit anisitaasimallutik inissinneqaraangamik ilaqutariinnik allanik najugaqateqartassanngitsut, Inuit Pisinnaatitaaffii pillugit Siunnersuisoqatigiit inassutaanut ilaavoq.
Meerartallit immikkoortinneqassasut
-Ilaqutariit inissialeqqinneqaraagamik meerartaqarpatalu meeqqap toqqissisimanissaa pillugu inunnit allanit najugaqarfigineqareersunut inissinneqartannginnissaat. Pisinnaatitaaffiit aallaavigalugit innersuussutit suliaammata soorunami tassani meeqqap illersorneqarnissaa tunngaviuvoq, Sara Olsvig oqarpoq.
Taassuma inassutitik qinikkanit eqqumaffigilluarneqarnissaat neriuutigisorujussuuaa.
-Ineqarnissamut pisinnaatitaaffik pisinnaatitaaffiummat politikkikkut eqqumaffigilluinnarneqassasoq neriuutigaarput, Sara Olsvig oqarpoq.