Siunnersuisooqatigiit: Tunisinissaq pitsaanerpaanngilaq

Aningaasanut inatsisissaq oqimaaqatigiittumik inerneqartinniarlugu Namminersorlutik Oqartussat pigisanik tunisinissaat pitsaanerpaanngilaq.
Allattoq Jens Thorin
novembarip 19-at 2010 11:38

Aningaasarsiornermut siunnersuisoqatigiit siulittaasuat, Copenhagen Business Schoolimi Københavnimiittumi professori, Søren Bo Nielsen oqarpoq. Taarsiullugu Nunani killerni allanisulli avatangiisinut akitsuutit atorneqarnerunissaat ujartorpaa.

Aappaagumut aningaasanut inatsisissap isumaqatigiinniutigineqarnerata nalaani, Naalakkersuisut 65 millioni koruuninik nassaariataarput. Taakkua ilaatigut Nuummi Tuapannguani inissiarsuarnik napasulianik marlunnik tunisinikkut ilaatigullu piginneqatigiiffiup, Namminersorlutik Oqartussat pigisaata suli isertuunneqartup, pigisaanik tunisinikkut pissarsiarineqalerput.

Kisianni taamaaliorneq pitsaanerpaanngitsoq, Søren Bo Nielsen isumaqarpoq:

- Malunnarluinnarpoq, massakkumiit siunissamut akisussaassuseqartumik aningaasaqarnermut politikeqarnissaq illuanik siunniunneqartoq. Kisianni aamma illuanik pigisanik tunisinikkut siunissami assersuutigalugu attartortut akiliutaatigut isertitassaraluit annaaneqarput. Tassa Landskarsip amigartoorutissaraluisa pigisanik tunisinikkut matussuserneqarneri pitsaanerpaanngilaq, Søren Bo Nielsen DR-imut oqarpoq.

- Akitsuutiniit akileraarutiniilluunniit isertitaqarsimasuuppat pitsaanerutissagaluarpara, professori nangippoq.

Taannami isumaqarpoq, akileraarutinit akitsuutinillu nutaanik atuutsitsilernissamut suli periarfissaqartoq. Tassami nunat killiit allat akileraarutinut politikkiminni avatangiisinut akitsuutit ilanngulluarsimagaat, nunatta taakkua aallutinngivissimavai.

- Avatangiisinik illersuilluni oqaluutigaluni, akitsuutinik tamatumunnga illersuinissamut iluaqutissanik, nunani killerni allani atorneqaleertunik, atortitsinaveersaarneq, isummamik aalajangiusimanninnerunngilaq. Aammami akitsuutit taamaattut pisortanit isertitassaqqilluinnarput, aningaasarsiornermut siunnersuisoqatigiit siulittaasuat, professor Søren Bo Nielsen, DR-imut oqarpoq.