Siunnersuisartut pitsaanernik atugaqarusupput

Efterskolertussanik siunnersuinerup pitsaanerusinnaanera ilinniagaqartunut aqqutissiuussisut peqatigiiffiata nassuerutigaa.
juunip 16-at 2010 10:30

Efterskolertussanik siunnersuineq ajorpallaarnerarlugu Danmarkimi efterskolet peqatigiiffiata uparuaanera ilinniagaqartunut aqqutissiuussisut peqatigiiffiannit assortorneqanngilaq.

- Ilumoortortaqarpoq, ilaatigummi qaapiartumik sulisoqartarpoq, Peter Frederik Gedionsen, nuna tamakkerlugu ilinniagaqartunut aqqutissiuussisut peqatigiiffianni siulersuisunut ilaasortaq, oqarpoq.

Pingaartumik atortussat amigaatigineqartut Peter Frederik Gedionsenip oqaatigaa.

- Paasissutissanik amigaateqarnerup kinguneranik meeqqat inuusuttullu siunnersorneqarnissamik amigaateqartut katataanissaminnut qaninnerusarput, Peter Frederik Gedionsen oqarpoq.

Taamaattumik ilinnialertussanik siunnersuinerup pitsanngorsarneqarnissaa peqatigiiffimmit suliniutigineqartoq, taassuma oqatigaa.

Efterskolertussanik paasititsiniaaneq pitsanngorsarniarlugu Danmarkimi efterskolit peqatigiiffiata dvd-liornissaq siunertaralugu Namminersorlutik Oqartussanut aningaasanik qinnuteqarpoq.

Danmarkimi efterskolit kattuffiata dvd-liornissamut aningaasanik qinnuteqaataat aningaasassarsiuunneqartoq, KIIIN-imit oqaatigineqarpoq.