Siunnersuisartut: Nuuttarnerit atorluarnerusariaqarput
Nunatsinni sulisinnaasut atorluarnerusariaqarput, sanaartornerup iluani sulisussaaleqiffiusunut ilinniarfiusinnaasunullu nuutsillugit, taama Nunatsinni aningaasarsiorneq pillugu statsministerimut siunnersuisartut nalunaarusiaminni kingullermi inassuteqarput.
Namminersornerullutik Oqartussat kommuneqarfiillu aningaasaqarnerat ukiuni kingullerni pitsanngoriartorsimavoq. Aningaasarissaarnissamullu akimmisaarfiunerpaasoq tassaavoq sanaartorfinni sulisussaaleqinerup akinik akissarsianillu qaffatsitsinera.
Inatsisartut aningaasanut inatsisaanni 2007-imut atuuttuni immikkut ittumik suliffissaqarfiusunut nuuttarnernut 3,8 mio. koruuninik immikkoortitsisoqareerpoq soorluttaaq kommunini nuuffiusussanut immikkut inissialiornissanut 25 mio. koruuninik immikkoortitsisoqareerluni. Taama pisoqarnera siunnersuisartut pitsaasutut isigaat, atorluarneqartariaqarsoralugulu.
Nunatsinni aningaasarsiorneq pillugu statsministerimut siunnersuisartut 1988-imi pilersinneqarput, tassanilu professor Christen Sørensen Syddansk Universitetimeersoq siulittaasuuvoq.
