Siunnersuisarfimmut suliaq tusarniaavigineqalerpoq

Siunnersuisarfiup, Ramsdalip, peqquserlussimasinnaaneranut atatillugu suliaq ,Koldingimi Vejlemilu pinerluttaalisitsisunut annertunerusumik suliassiisimavoq. Aviisi Danmarkimi ullormut saqqummersartoq, Jyske Vestkysten, ullumi saqqummersoq, allappoq, suliaq pingaaruteqarluinnartutut isigisitsik, pinerluutigisimasamulli akisussaatinneqarnerup qanoq annertutiginera oqaatigissallugu suli siusippallaartoq. Koldingimi Vejlemilu Niuernermut ilinniarfiup aaqqissuussaanik qaraasaasiamut tunngatillugu pikkorissartitsisimanermut, Kalaallit Nunaanniit peqataaffigineqartumut, suliaq tunngasuuvoq.

Pikkorissarnermut atatillugu pisortaqarfiit aningaasaataannik atuisoqarsimasoq pasitsaanneqarsimavoq, tamatumalu sukumiisumik nassuiartinneqarnissaa ilimagisamit pisariuneruvoq. Vejlimi politiit suliaq Koldingimi politiinut ingerlateqqissimavaat, pinerluttaalisitsisullu maanna arlaleriarlutik tusarniaasussanngorput.

Suliaq annertooq naammassiuminaatsorlu pikkorissarsimanermi uppernarsaatinut inuillu qassit pikkorissartinneqarsimanerannut tunngasuuvoq. Pisortaqarfiit aningaasaataannik piaaraluni atuisoqarsimanersoq maanna apeqqutaalerpoq.

Taama pisoqarnerata kingorna siunnersuisarfinnik Ramsdalimik Inulerisunillu Nuup Kommuneata suleqateqarnini taamaatippaa, siunnersuisarfiillu taakku peqquserlussimasutut politiinut nalunaarutigineqarput.