Siunnersuisarfik Ramsdal: Pikkorissartitsisuusaanngilagut

Siunnersuisarfik Ramsdal peqquserluuteqarsimasutut pasineqarluni politiinut tunniunneqartoq maanna nalunaarpoq Sullissivik Nuuk pikkorissartittuusaarsimanagu. Ramsdalip pisortaata Karl-Erik Nielsenip politiinut tunniussineq tunngavissaqanngilluinnartutut nalunaarutigaa isumaqarlunilu akisussaaffik Nuup Kommuneata tigusariaqaraa, kommunimi kukkulluni Ramsdalimut 35.970 koruuninik akiliisimammat.

- Nuup Kommuneata kukkulluni akiliiffigivaatigut. Taamaattumik paasisinnaanngilarput uatsinnut kukkuneq akisussaaffigitinniarneqarmat. Pikkorissartitsinerput akilereerlugu Nuup Kommunea akileeqqippoq, taamaalilluta uagut marloriarluta akileeqqusinikuunata aningaasanik pissarsivugut, Ramsdalip pisortaa Karl-Erik Nielsen taama oqarpoq.

Ramsdalip peqquserlussimasutut pasineqarnera tunngavissaqanngippat siunissami Nuup Kommuneanik suleqateqarneq qanoq nalilerneqassanersoq aperingatsinni ima akivoq:

- Sivisuumik nipangersimanitsinnut pissutaavoq una pisoq assut suliffeqarfitsinnut ilungersunarsimammat. Aamma suliffeqarfittut isigineqarnerlunnissarput illersorniarlugu nipangersimasariaqaratta kiisalu neriuutigisimavarput siunissami Nuup Kommunea suleqatigisinnaassallutigu, tamannali maanna ajornakusoorsisimagunarpoq.

Inuit ataasiakkaat pasilliisaqattaarnerillu pinnagit piviusoq toqqammavigalugu aaqqiisinnaassalluta neriuutigaarput, massakkutut peqquserluuteqarsimasutut pasilluta politiinut tunniussinerit pinnagit suliariaqqinnissaq suli neriuutigaarput, Ramsdalip pisortaa Karl-Erik Nielsen taama oqarpoq.

Radioaviisip sapaatip akunnerani kingullermi Ramsdal peqquserlussimasutut pasineqarnini peqqutigalugu politiinut tunniunneqarsimaneranik nalunaarfigereeraalu suliffeqarfiup 36.000 koruunit Nuup Kommuneanut utertitsissimavai.

Taamatulli paasitinneqarnerup kingorna kommunimi allaffissornermi pisortaagallartup Morten Kahlkep isumaa allannngorsimanngilaq taanna ima Radioaviisimut oqarpoq:

- Ramsdalip nammineq saaffiginnissimasoq uppernarsarsinnaavara, suliarli pillugu aalajangernerput alajangiussimavarput.

Morten Kahlke siusinnerusukkut Radioaviisimut nalunaaruteqarpoq, inuit pikkorissarnermi peqataasimanngitsut ilanngullugit akiligassami allattorneqarsimasut, taamaalillunilu peqquserluttoqarsimasinnaanera pasitsaassimagitik.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat