Siunnersortit, piniartut assiliivilisartut suleqatigiinnerunerlu

Sinerissami sumiiffinni piniarnermut siunnersorteqalernissat, piniartut naammattoortakkaminnik assiliisalernissaat paaseqatigiinnerullunilu suleqatigiilernissaq, tamakkuupput Aalisarnermut Piniarnermullu Pisortaqarfiup atorfilittaminik piniartoqarfinnut angalatitsinerata kingunerisassaasa ilaat.

Piniartunik naapeqateqarneq pisortaqarfiup nuannaarutigeqaa, taama oqarpoq piniarnermut pisortaqarfimmi allaffimmi pisortaq Lars Geråe.

Tikeraarneqarsimasut nunaqarfiit illoqarfiillu tassaapput Qaanaaq, Siorapaluk, Upernavik Kullorsuarlu. Taakkua saniatigut Ilulissat tikeraarneqartussaasimagaluarput, silali pissutigalugu anguneqarsimanani. Kommunalbestyrelseli ataatsimeeqatigineqarsimavoq, apeqquteqaatillu piniartut akiortugassaat kommune suleqatigalugu piniartunut apuussorneqarput.

Lars Geråe aamma ilisimatitsivoq piniartoqarfinni tikitani innuttaasunik, piniartunik, nunaqarfinni aqutsisunik kommunalbestyrelsenillu ataatsimeeqateqarnerit iluaqutigineqalereersut. Akissutit misissorluarneqarput allaallu apersueriaatsinut tunngasut tulliani angalanissami atugassat piareersarneqalereerlutik.

Sinerissami sumiiffinni piniarnermut siunnersorteqalernissat, piniartut naammattoortakkaminnik assiliisalernissaat, soorlu timmiaqarfissuarnik piniakkanik allanik assiliisalernissat, kiisalu piniartut aamma pisortaqarfiit biologillu akunnerminni paaseqatigiinnerullutik suleqatigiilernissat anguniarneqarput. Tullianimitaava pisortaqarfik sumut angalatitsissava?

- Tassa tulliani pilersaarutaavoq upernaamut tunumut – Illoqqortoormiut Ammassallillu kommuniinut angalanissaq. Taava misissuinerit inerneri nalilersoriarlugit sinerissap sinnerani apersuisitsinerit nangillugit apeqqutit iluarsaatat atorneqassapput, Lars Geråe oqarpoq.

Paasissutissat piniartut ingerlateqqitaat siunissami uumassusillit iluaqutigineqarnerisa aqulluarneqarnerunissaannik kinguneqassapput. Naatsorsuutigineqarpoq suliap ukiup aappaata qeqqani tullermi ingerlatinnissaa.