Siunnersortit Namminersornerullutik Oqartussani akissaatiginnerusarput
Inunnik isumaginninnermut siunnersortit Namminersornerullutik Oqartussani atorfillit, kommunini atorfilinnut sanilliullugit akissaatiginnerusarput. Tamannalu pissutaalluni kommunini atorfillit soqutiginarnerusunut atorfissarsiortarput.
-Akissaatit siornarnit allannguuteqanngillat. Sulisut amerlassussaat eqqarsaatigalugit aamma allannguuteqanngillat. Ukiup ingerlanerani iluatsikkiartortutut isikkoqaraluarpoq, soraartulli arlaqarneri eqqarsaatigalugit pissutsit siornatulli uteqqinnikuupput, Nuup kommuniani meeqqanut inuusuttuaqqanullu immikkoortortaqarfiup pisortaa Nauja Benjaminsen oqarpoq.
Nuup kommuniani inunnik isumaginninnermi immikkoortortaqarfimmi sulisut taarseraattorujussuupput, siunnersortit suliffinnut atugarisaarnerusunut pingaartumillu akissaatiginnerusunut ujartuisarput. Arlallit Namminersornerullutik Oqartussani isumaginninnermi siunnersortitut atorfeqalertarput, siunnersortitut akissaatit tassani pitsaanerummata. Nunatsinni inunnik isumaginninnermi siunnersortit ilinniarsimasut peqatigiiffiata siulittaasuata, Vittuaraq Poulsen oqarpoq siunnersortit qaammammut 3.000 koruuninik akissaatiginnerusartut, suliffimminnilu ulaperuluunnginnerusartut.
Nuup kommuniani inunnik isumaginninnermik siunnersortit Namminersornerullutik Oqartussat assigalugit sulisutik siunnersortinik taaguteqalersinniarlugit, Nuup kommunalbestyrelseani isumaginninnermik ataatsimiititaliami siulittaasoq Ove Karl Berthelsen siunnersuuteqarsimalluni oqarpoq.
-Amigaateqarnerujussuarput eqqarsaatigalugu, minnerunngitsumillu sulisut massakkut ulapeqisut eqqarsaatigalugit, ataatsimiititaliamit siunnersuutigaara siunnersortinik atorfinnik pilersitsissasugut. Imaassinnaavoq siunnersortit inunnik isumaginninnermut siunnersortitut ilinniarsimasuusut, siunnersortitulli aningaasalerlugit isumaqatigiissuteqarfigalugit piffissami aalajangersimasumi atorfinitsinneqarsinnaaneri misissorneqaqqullugu siunnersuutigalugu, Ove Karl Berthelsen oqarpoq.
Inunnik isumaginninnermik siunnersortit atugarisaat siorna radioaviisimit sammineqarput. Kommunaldirektør Kim Hvistendahl isumaginninnermik siunnersortit akissaataasa qaffatsinneqarnissaat neriorsuutigaa, borgmesterillu Agnethe Davidsen-ip allaffimmiutut ilinniarsimasut qaammatini pingasuni pikkorissartinneqarnissaat pilersaarutigaa, taamaalillutik isumaginninnermut siunnersortit suliaannik oqilisaanneqarniassammata. Aamma Ilaqutariinnermut naalakkersuisuusimasup Tommy Marø-p kommunip ajornartorsiutinik qaangiinissaanik ikiorniarlugit neriorsuutigaa. Ukioq ataaseq qaangiukkaluartoq neriorsuutit tamarmik eqquutsinneqarsimanngillat.
