Siunnersortinut avataaneersunut millionerpassuit atorneqartut
Ukiullu siuliani, 2013-imi, Namminersorlutik Oqartussat siunnersortinut aningaasat suli amerlanerusut atorpaat - tassalu 204 millionit koruunit.
Partii Naleqqameersup Anthon Frederiksenip Namminersorlutik Oqartussat siunnersuisunik avataaneersunik atuinerata annertussusaanik § 37 naapertorlugu apeqquteqaataanut akissuteqarluni aningaasaqarnermut naalakkersuisoq Andreas Uldum taama ilisimatitsivoq.
Naalakkersuisoqarfiillu tamarluinnarmik siunnersortinik avataaneersunik atuisartut Andreas Uldumip aamma ilisimatitsissutigaa.
Peqatigitillugu aamma erseqqissaatigaa Namminersorlutik Oqartussat siunnersortinik avataaneersunik atuisarnerminnik unitsitsivissinnissaat piviusorsiortuunngitsoq.
Andreas Uldumilli oqaatigaa Naalakkersuisut siunnersuisunik avataaneersunik atuinermut tunngatillugu 2016-imi immikkut suliniuteqarniartut.
Suliassallu ilaatigut suliariumannittussarsiuunneqartassapput, pitsaassuseq akillu pitsaanerusut qulakkeerniarlugit, aningaasaqarnermut naalakkersuisoq taama nassuiaavoq.
