Siunissaq pitsaanerusoq neriuutigaat

Canadami naggueqatitta akornganni qaammatini tulliuttuni pingaarutilinnik qinersisoqassaaq.
apriilip 03-at 2011 13:00

Qinersineq siulleq pissaaq ullumimiiit qaammatip ataatsip qaangiunnerani, qinersinerullu aappaa pissalluni Nunavimmi apriilip 27-ani.

Canadami naalakkersuisunut qinersinissaq Inuit Tapiriit Kanadamiit aamma atorluarniarneqarpoq, taakkumi piumasariniarpaat Inuit nunaannut aningaasat amerlanerit tunniunneqartalernissaat.

Aningaasat taakku issittumi illuliortiternernut atorneqarnissaat anguniarneqarpoq. Minnerunngitsumik inunnik isumaginninnermut sullissinerup pitsanngorsaavigineqarnissaa anguniarneqarluni.

Aamma ilinniagaqarnerup tungaatigut Inuit pitsaanerusunik periarfissaqarnissaat Inuit Tapiriit Canadamiit piumasarineqarpoq. Taamatuttaaq avatangiisinik mingutsitsisoqassangaluarpat upalungaarsimanerup pitsanngorsaavigineqarnissaa anguniarneqarluni.

Qinersinerup aappaa Nunavimmi apriilip 27-ani pissaaq, tassani qinigaasut Canadap inatsisartuini ilaasortanngussapput.

Nunavimmi namminerisamik qinersineq siulleq ukiut qulingiluat matuma siornagut pivoq.