Siunissami utoqqarnut inissiat oqaluuseraat
Oqaluuserisassani immikkut sammineqartussat pingasuupput. Nunani Avannarlerni Killerni qinikkat atorfilittatik immikkullu ilisimasallit qulliunerusut ilagalugit assigiinngitsunik oqaluuserisaqassapput, soorlu Nunani Avannarlerni Killerni siunissami utoqqarnut angerlarsimaffiusussat, Atlantikup Avannaani Issittumilu imaatigut ajutoortoqarsinnaaneranut upalungaarsimaneq, aamma siunissami imartanut tunngasut, Nunat Avannarliit Siunnersuisoqatigiiffiat peqatigalugu isumasioqatigiissutigineqassallutik.
Nunat Avannarliit Killiit Siunnersuisoqatigiiffianni ilaasortaasimasoq Jonathan Motzfeldt eqqaaniarlugu ataatsimiinnerup aallartinnerani minutsimi ataatsimi nipaallisimasoqarpoq.
Utoqqarnut inissianut atatillugu oqallissaarutitut saqqummiunneqartuni erserpoq, utoqqarnut inissiat utoqqaat qanoq atsigisumik paaqqutarineqartariaqarnerannut attuumassuteqarluinnartoq, taamatullu aamma napparsimaneq pissutigalugu annertuumik paaqqutarineqartariaqarneq imaluunniit utoqqaat naapertuuttumik ineqarnissaasa qularnaarneqarnissaanik pisariaqartitsineq kisimi pineqarnersoq.
Utoqqaat kattuffiisa aallartitaasa saqqummiussaanni erserpoq, utoqqaat najugaqarfissaannik sanaartornermut atatillugu pilersaarusioqataasarnissanut kissaataat.
Kalaallit aallartitaasa pisortaat Josef Motzfeldt erseqqissaavoq, toqqissisimanerpaamik utoqqalinissaq qulakkiissagaanni innuttaasoq oqartussallu suleqatigiilluartariaqartut.
- Nunat Avannarliit Killiit pingasut utoqqartai ukiuni tullerni 20-ni marloriaatinngussangatinneqarput. Taamaattumik utoqqaat ineqarfiinik pitsanngorsaanissaq aalajangigassanut pingaarnernut ilaasoq, Josef Motzfeldtip oqaatsini nangippai.
