Assi: Vagn Hansen

Siunissami timersorneq ataatsimeersuartut 130-t eqqartussavaat

"Siunissami Kalaallit Nunaanni timersorneq" qulequtaralugu Nuummi pingasunngorpat tulliani ataatsimeersuartoqassaaq.

Peqataasut 130-t saqqummiisussallu 40-t nunatsinni timersornerup qanoq qaffassarneqarsinnaanera ataatsimeersuarnermi ulluni pingasuni immikkut ittumik sammissavaat.

Idrættens Analyseinstitutip, Idanip, Nunatsinni timersorneq pillugu siorna misissuinerani inernerit aallaavigalugit oqallittoqassaaq. Nunatsinnimi timersorneq nukittorsarneqarsinnaasoq misissuinerup ilaatigut takutippaa.

Læs også Analyse skal forbedre Grønlands idrætsliv

Ataatsimeersuarnermi saqqummiisussat 40-t nunatsinneersut nunanit allaneersullu timersornerup qanoq pitsaanerulersinneqarsinnaaneranik siunnersuusioreerpata peqataasut sinnerisa kattullutik oqallisigissavaat.

Soorlu assersuutigalugu peqatigiiffiit ineriartortinneqarnissaannik, suliniutinik pilersitsinissamik, nutaalianillu atortorissaarutilersuinissaq eqqartorneqassapput, taassumalu saniatigut timersornerup inuiaqatigiit peqqissuunissaannut ilaatinneqartarnera, piginnaanilinnik ineriartortitsisarneq, pikkorivissut timersortarnerat, Nunattalu nunat assigiinngitsut akornanni peqataasarnera aamma samminneqassallutik, Idan allappoq.

Tamanna Europami arsaattartut kattuffianni, UEFA-mi, ilaasortamit Allan Hansenimit peqataaffigineqassaaq, Nunattalu Uefamut ilaasortanngorsinnaaneranut periarfissai taassuma saqqummiutissavai.

Ataatsimeersuarnermi saqqummiisussarpassuit ilaat tassaapput:

  • Nivi Olsen, kultureqarnermut naalakkersuisoq, timersorneq pillugu isummani misilittakkanilu oqaluttuarissavai.
  • Allan Hansen, Uefa, Nunatta Uefamut ilaasortanngornissaminut periarfissai oqaluttuarissavai.
  • Laust Løgstrup, Qeqqata Kommunia, Sisimiuni qaarsup iluani timersortarfiliornissamik suliniut oqaluttuarissavai
  • Nuka Kleeman aamma Carsten Olsen, Kalaallit Nunaanni Timersoqatigiit Kattuffiat, kattuffiup ataatsimeersuartitsinerata siunertaa oqaluttuarissavaat.

Kalaallit Nunaanni Timersoqatigiit Kattuffiata Elite Sport Greenlandillu Lokale og Anlægsfonden, Dansk Boldspil Union kiisalu Idrættens Analyseinstitut suleqatigalugit ataatsimeersuarneq aaqqissuussaraat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat