Siunissami ilinniartitsisut kattuffiat ataasiinnanngussaaq

oktobarip 20-at 2006 17:14

IMAK-imi siulittaasoq Sivso Dorph, ilinniartitsisut kattuffiisa ataasiinnanngortinneqarnissaanut suli kaammattuivoq.

Siunnersuutaa assigiinngitsunik qisuariarfigineqaraluartoq, IMAK-imi siulittaasup, nunani avannarlerni ilinniartitsisut kattuffiisa ataatsimuulernerat nunatsinnuttaaq siunissami aqqutissaasutut tikkuarpaa.

-Naliginnaavoq kattuffiit suleqatigiinngippallaarnerat, taamaalillutalu anguniakkat assigiinngitsut siunnerfigisinnaasarpagut, ataatsimut kattuffeqaraluarutta ajornartorsiutit qanimut suleqatigiissutigisassangaluarpagut. Sivso Dorph oqarpoq.

IMAK-imi siulittaasup Sivso Dorphip ilinniartitsisut kattuffiisa ataatsimoortilernissaanut siunnersuutini maannakkut oqallisigineqartussatut ammaasinertut taavaa.

-Maannakkut aaqqiinertut inernilerlugu isigineqassanngilaq, siunissamili periarfissatut isigisassaavoq, nunatsinni kattufeqarneq ataqqisariaqarpoq, kisianni siunissami oqallisissatut una ilaalerpoq.

Kattuffiit ataatsimoortilerneqanngikkaluarlutik suleqatigiissinnaapput, tamannalu oqallisissanut aamma ilaasoq Sivso Dorph oqaatigaa.

- Kattuffiit immikkuullaarilluta ingerlagaluarutta, taava aamma taanna qanimut oqaloqatigiissinnaanerput aporfeqartuartussaavoq.