Siunissami ajorneruliinnassaaq

Kuup qaaffasinnera aatsaat taama annertutigaaq, tamannalu siunissami ajorneruliinnassaaq. Kuup ingerlaarfia itinerulersinnianngikkaanni nutaanilluunniit ikaartarfiliornissaq maanna Kangerlussuarmi pisumut aaqqissutissatuaapput.

- Sermersuup aakkiartupiloornera assigiinngitsunik tunngaveqarpoq. Ilaatigut tunngaviupput sermersuup katitigaanermini allanngoriartornera aammalu kiassutsip allanngoriartornera. Sermeq apummik qallerneqarsimaguni aput seqinermik aatsinneqaannassagaluarpoq, maannali sermeq apummik illersuutissaqanngilaq. Tamaannalu isumaqarpoq sermip aakkiartornera maanna annertoorujussuusoq.

Sermip sananeqaatimini taartunik pujualaqarpoq, maannalu apummik illersuuteqannginnami seqinermik aatsinneqalertorpoq, Ilisimatooq GEUS-imeersoq Dirk van As oqaluttuarpoq.

Kangerlussuup inissisimanera nunamut ilorpasissumi inissisimavoq, taammattumillu aasami kiattorujussuusarpoq, ukiumilu qianartorujussuusinnaalluni. Taammaattumillu silaannaap kissatsikkiartornerani navianartorsiortsinneqarluni.

-Sineriak tamakkerluni silaannaap allanngoriartornerani eqqugaaqqavoq, kisiannili sumiiffinni allani Kangerlussuartulli annertutigisumik eqqugaaqqasoqanngilaq. Silallu kissatsikkiartornera ilutsigalugu isumaqaannarpoq siunissami kuuk suli qaffasinnerulerumaartoq.

Tamannalu kommunemi oqartussat siunissami pilersaarusiornissaminni isiginiartariaqaassavaat, sermersiooq Dirk Van As taama naggasiivoq.