Siunissaa sapaatip-akunnera qaangiuppat aalajangiiffiussaaq

-Siullermik oqaatigissavara, aningaasanut inatsimmi 2010-moortumi aningaasanik 2,5 millioni koruunit missaani Arctic Umiaq Linemut immikkoortitsereernikuuvugut, paasinarsereerporli aningaasat 2,5 million koruunit naammanngitsut. Taamaammat-una Arctic Umiaq Line qisuariartoq, Angallannermut Naalakkersuisoq Jens B. Frederiksen oqarpoq.

Aningaasat naammanngitsut Arctic Umiaq Linep saqqummiuppaa.

Jens B. Frederiksenimut Arctic Umiaq Line pillugu aningaasanik tapiissuteqaannarani allanik pilersaaruteqarnersoq paaserusussimagaluarparput, oqaaseqarfigiumasimanngilaali.

Qanoq aalajangertoqassanersoq angallannermut isumalioqatigiissitap siunnersuutaata aasamut saqqummernissaanut utaqqeqqusivoq:

- Angallannermut isumalioqatigiissitap angallannerup siunissami qanorpiaq isikkoqassanersoq pillugu inassuteqaataa utaqqerusupparput, taava kingorna Naalakkersuisuni aalajangiiffigiumaarparput, Jens B. Frederiksen nangippoq.

Kommune Kujallermi borgmesterip Simon Simonsenip angallannermut isumalioqatigiissitap nalunaarutaata saqqummiunnissaa aamma utaqqivaa umiarsuaarutissagaluarpallu kujataani najugallit mattunneqarnerulernissaat annilaanngassutigalugu.

Angallannermut Naalakkersuisup kujataamiut annilaanganerat immikkut oqaaseqarfigerusunngilaa, oqarrporli Kalaallit Nunaanni angallannerup pitsaasumik ingerlanissaa angallannermut isumalioqatigiissitap eqqartugassaasa qulequtarissagaat.

- Taakku Naalakkersuisuni sapaatip akunnerata tulliani sammisussaagatsigit uanga massakkut oqaatigerusunngilara. Aatsaallu Naalakkersuisut aalajangiiffigereerpassuk oqaaseqarsinnaassaagut, Angallannermut Naalakkersuisoq naggasiivoq.

Arctic Umiaq Line Air Greenlandip Royal Arctic Linellu pigivaat, umiarsuarmi sulisut ilanngullugit 40-nik sulisoqarpoq. Umiarsuaatileqatigiiffiup Sarfaq Ittuk maanna umiarsuaatituaraa.