Siumut: Upaaruaaneq tunngavissaqarluarpoq
Siumup siulittaasua Aleqa Hammond oqarpoq:
- Isumaqarpunga innuttaasut nunattalu pisuussutaat pineqartillugit naliliiniarnermi taama pingaaruteqarluinnartigisumi tusarniaanerit periarfissinneqartariaqartut, oqarpoq.
Capricornip Cairn Energymit pigineqartup qilleriniarluni qinnuteqaataata tusarniaanertai pipallataapput, aallartimmatami qaammatit pingasut qaangiutiinnartut qillerinerit aallartissimallutik. ICC-p Avatap, KANUKOKA-p aamma Kommuneqarfik Sermersuup tusarniaanernut akissuteqarnerminni suleriaaseq taamaattoq tamarmik uparuartorpaat oqarlutik suliaq ulapputaavallaarsimasoq.
Akissutit takkutiinnartut Cairn Energy-p sapaatit akunneri marluk qaangiummata naliliineq kingulleq naalakkersuisoqarfimmut tunniuppaa. Maajillu arfineq pingajuat nalliinnartoq Naalakkersuisut Cairn Energy uuliasiorlutik qillerisinnaanerannik akueraat. Kingorna qaammat qaangiummat qillerinerit siulliit ingerlanneqalerput.
Suliat taama annertutigisumik apeqqutertallit pitsaanerusumik sukumiinerusumillu ingerlanneqartarnissaat Aleqa Hammondip Naalakkersuisunut piumasaqaatigaa.
- Isumaqarpunga Naalakkersuisut pisumut tunngatillugu isumatusaaqqissaartumik nunarput sinnerlugu iliuuseqartariaqartut, innuttaasut toqqissisimaffigisaannik peqataatitsisuusumik, tusarniaanerit piffissaqarluartillugit. Pingaartorujussuartullu Siumumiit isumaqarfigaarput, avataaninngaanniik selskabersuit maanga tikikkiartortut aammalu suliartortut, taakkua namminerisamik aalajangissanngilaat qanoq sukkatigisumik sulisoqassanersoq, Aleqa Hammond oqarpoq.
Inatsisartuni ilaasortaq alla Naaja Nathanielsen IA-meersoq Aatsitassanut inuussutissarsiornermullu Naalakkersuisumut Ove Karl Berthelsenimut arlalinnik §37-nik apeqquteqaasiortarsimavoq, Ove Karl Berthelsenillu isumaqatigaa tusarniaanerit sapaatit akunneri arfineq pingasunut amerlineqassasut. Naaja Nathanielsenilu isumaqarpoq, suliaqarfik misissorluarneqassasoq:
- Tusarniaanerit kingorna akuersisoqarnissaanut piffissaq misissorluarneqassasoq politikkullu eqqarsaatigineqarnissaa isumaqarpunga, Naaja Nathanielsen oqarpoq.
Kisianni isumaqarpit suliaq sukkavallaamik ingerlanneqarsimasoq, tusarniaaffigisat tamakkerlutik anguneqanngitsoorlutik?
- Uani eqqartorneqartumi taamatut ittoqarsimanera ilisimanngilara suliartaani ilaannginnama, kisiannili pisariaqarpoq tusarniaanermi akissutit atorneqartarnissai, taamaattumik akuersisoqartinnagu misissueqqissaarnissaanut piffissaliisoqartariaqarpoq, Naaja Nathanielsen oqarpoq.
Aatsitassanut inuussutissarsiornermullu Naalakkersuisumut Ove Karl Berthelsen ullaap tungaa uparuartuutinut oqaaseqartinniarlugu attaviginiarsimagaluaratsigu iluatsissimanngilarput.
