Siumut: Ukiortaami oqalugiaat nutaartaqanngilaq

Aleqa Hammond isumaqarpoq inuiaqatigiit ukiumi nutaami qanoq atugaqarumaarnerat annikitsuinnarmik oqaaseqarfigineqartoq.

- Namminersornerup eqqunneqarnerani suleqatigiinnissamik oqariartuut assorsuaq maqaasivara. Kuupik Kleistip nunap siuttuatut pisussaaffigaa inuiaqatigiit tamatta ataatsimoorluta neriuffeqarlutalu ukiumi nutaami siunnerfeqatigiinnissarput.

Aleqa Hammond aamma isumaqarpoq Inatsisartut ukiarmi ataatsimiinneranni susoqarsimaneranik oqaluttuareqqiinermut Kuupik Kleistip piffissaq angisooq atoraa.

- Pingaartumik maqaasivakka ukiuni aggersuni naalakkersuinikkut suliaqarnermi anguniagassat aammalu aalajangigassat pingaaruteqarluinnartut, inuiaqatigiinnullu annertuumik sunniuteqartussat.

- Aamma inuussutissarsiutit pingaaruteqarluinnartut ineriartorteqqinneqassappata neriunarsinnaasumik, peqataatitsiffiusinnaasumik aammalu siunnerfeqatigiiffiusinnaasumik oqariartuuteqannginnera, assut maluginiarpara, Aleqa Hammond oqarpoq.

Oqariartuutigineqartut siorna oqaatigineqarsimasunit arlaannaatigulluunniit nutaartaqanngitsut Siumup siulittaasua isumaqarpoq.

- Aamma silap pissussaata allanngoriartornera pillugu Københavnimi qanittukkut isumaqatigiinniarnernut atatillugu Nunatta danskillu naalakkersuisuisa isumaqatigiissutigisaat, Aleqa Hammondip pikkunartorsuartut isiginngilaa.

- Kyotomi isumaqatigiissut peqataaffigissallugu aalajangerattali, ingerlariaqqinnissamut aamma peqataassalluta pisussaaffilerpugut. Tassalu nunarsuarmioqataasutut peqataanissarput qulakkeerniartussaavarput. Taassuma namminerisamik isumaqatiginninniarfittut qanoq pitsaatigisumik angusaqarfiunera aamma oqallisigineqarsinnaavoq. Aamma Københavnimi isumaqatigiissut nunarsuarmioqataasunit tamanit hurraartuutigineqanngeqisoq, uagut kisiartaalluta hurrartuutigisagutsigu ingasappallaaqaaq, Siumup siulittaasua, Inatsisartunut ilaasortaq Aleqa Hammond, taama oqarpoq.